Elbasy Nursultan Nazarbaev ishki týrizmdi damytýdyń paidasyn aitty, - dep habarlaidy kaz.tengrinews.kz tilshisi. Bul týraly Elbasy "Habar" arnasyna bergen suhbatynda aitty.
"Týǵan jerge, aýyl-aýylǵa nemquraily qaramaý kerek. Týǵan jerdiń topyraǵy, árbir ósimdigi, árbir qumyrsqasy biz úshin óte qymbat. Otandy súiý - elińdi súiý degennen bastalady. (...) Osyǵan bailanysty Qazaqstannyń kieli jerleri dep otyrmyz. Parijge barsań, Napoleonnyń jatqany jerin kórsetedi, óziniń tarihyn, Eifel munarasyn kórsetedi, al Ispaniiaǵa barsań óziniń burynǵy astanasyn kórsetedi, taý-sýlaryn kórsetedi. Sol siiaqty ár eldiń bir nysandary bar. Qazaqstan da eshkimnen kem emes. Bizdiń de kieli jerlerimiz kóp", - dedi Qazaqstan Prezidenti.
Sonymen qatar, Nazarbaev eldiń ár jerindegi nazar aýdararlyq muralarymyzdy sanamalap berdi.
Kieli jer degende ata-babalardyń molasyn, mazaryn aitýdyń qajeti joq. "Bizdiń qazaq oǵan da túsip ketedi. Kieli jer degen qazaqtyń óziniń biletin jerleri, esinde saqtap, ekinshi sol turatyn aýdannyń, oblystyń jerleri, úshinshi, dúnie júzine belgili nysandar. Endi osyǵan keleiik, bizdiń esimizge á degende ne túsedi? Qoja Ahmet Iassaýidiń kesenesi túsedi. Arystan bab túsedi. Ańyz tulǵalar esimizge túsedi. Batys Qazaqstandy aitsaq, murajai siiaqty bolyp jatqan dalasy esimizge túsedi. Atyraýdy aitsaq, baiaǵy Altyn Ordanyń Jaiyqtyń boiynda jatqan handary esimizge túsedi. Ortalyq Qazaqstandy aitsaq, "Ulytaý", qazaqtyń handary jinalǵan jeri. Shyǵysqa barsaq, saq zamanynan bergi qazba qundylyqtary dúnie júzine belgili bolyp kele jatyr. Ońtústikke barsaq, altyn adamnyń shyqqan jerleri... Sondai-sondai, dúnie júzine kórsetetin kieli jerler bar, ózimizdiń kieli jerler bar. Olar ne úshin kerek? Ol ishki týrizmdi aldymenen damytý", - deidi Elbasy.
Nazarbaev qazirgi kezde shetelge baryp demalǵysy kelmeitinin aitty. Onyń pikirinshe, Býrabaiǵa jeter ásem jer joq.
"Qazir keńdik bolǵannan keiin jer sharyn sharqyp, anda baramyz, munda baramyz, demalysqa anda da, munda da ketemiz. Bir qazaqtan "Qazaqstannyń barlyq jerin aralap shyqtyń ba" dep surap kórseń, ondai az. Mysaly, osy jyldardyń ishinde Qazaqstannyń men barmaǵan túkpiri joq dep aita alamyn. Dúniedegi adamdar demalatyn jerlerdi de kórip shyqqan adammyn. Kele jatqan urpaqqa da, zamandastaryma da aita alamyn. Men qazir eshqaida barǵym kelmeidi demalysqa. Qazir Býrabaida otyrmyz, mundai keremet jerdi esh jerde kórmeisiń osy kúni. Tabiǵaty saqtalǵan, ádemi, jerdiń jánnaty siiaqty. Kóli de bar, taýy da bar, sýy da bar. Dál osylai Shyǵys Qazaqstanǵa barsań, adamnyń aiaǵy baspaǵan. Ertistiń sýynyń seksen paiyzy ózimizdiń ózenderden qurylatynyn árkim bile bermeidi. Sol ózenderdiń barlyǵy sarqyrap, Ertiske quiylyp jatyr, ár ózenniń barlyǵy keremet, Alataýdyń baýraiy óz aldyna", - dedi Nazarbaev.
