Qazaqstan prezidenti Nursultan Nazarbaev áleýmettik qamsyzdandyrý máseleleri boiynsha ózgerister men túzetýler engizý týraly zańǵa qol qoidy. Oǵan sáikes tabysy 60 myńnan tómen qazaqstandyqtar úshin salyq júktemesi azaitylady, dep habarlaidy sputniknews.kz Aqordaǵa silteme jasap.
Buǵan deiin Nursultan Nazarbaev eń tómengi eseptik kórsetkishtiń 25 eselengen kóleminen az jalaqy alatyndarǵa salynatyn jeke tabys salyǵyn azaitý arqyly olardyń salyq júktemesin jeńildetýdi usynǵan bolatyn. Elbasynyń usynysynan keiin parlament zańǵa engizilgen túzetýlerdi qabyldady. Endi jalaqysy tómen qyzmetkerler úshin jeke tabys salyǵy on esege tómendeidi.
Al salyqty azaitýdan shyǵatyn qarjy olardyń jalaqysyn kóbeitýge jumsalady. Osynyń nátijesinde Qazaqstanda eki millionnan astam turǵynnyń jalaqysy ósedi.
Atalǵan norma 2019 jyldyń 1 qańtarynan bastap kúshine enedi dep josparlanyp otyr.
Sondai-aq, túzetýlermen osy jyldyń 1 shildesinen kámeletke tolǵan, bala kezinen birinshi toptaǵy múgedekterdi baǵyp otyrǵan ata-analar úshin qosymsha memlekettik járdemaqy engizildi. Qosymsha járdemaqyny shamamen 14 myń otbasy ai saiyn alatyn bolady. Járdemaqy kólemi biyl eń tómengi kúnkóris deńgeiiniń 1,05 mólsherin nemese 29 699 teńgeni quraidy.
