Prezident Nursultan Nazarbaev "Jańa gýmanitarlyq bilim. Qazaq tilindegi jańa oqýlyq" jobasy aiasynda shyqqan alǵashqy oqýlyqtardyń tusaýkeserinde bul bastamanyń mańyzdylyǵyn atap ótti, dep habarlaidy Sputnik Qazaqstan tilshisi.
"Bolashaqqa baǵdar: Rýhani jańǵyrý" baǵdarlamasynyń birneshe baǵytyn oryndap kele jatyrmyz. Onda bes sala qamtylǵan. Sonyń ishindegi eń mańyzdysynyń biri — júz kitapty qazaq tiline aýdarý. Buryn-sońdy mundai bolǵan emes. Meniń jumys stolymda kitaptyń bári jatyr", — dedi tusaýkeserde Nazarbaev.
Memleket basshysy bul kitaptardy ózi oqyǵanda qolǵa timegen qundylyq ekenin atap ótti.
"Prezident bolyp qyzmet etken jyldary sonyń bárimen bilip-tanystyq. Ǵylym salalalary, psihologiia, tildiń tarihy jóninen biz esh ýaqytta tanysqan emespiz. Qazir aǵylshyn tilinde jastarymyz oqyǵan shyǵar. Biraq qazaqtyń balasy tanyspaǵan. Bir jaǵynan qazaq tilin baiytyp, ekinshi jaǵynan bilimdi odan ári tereńdetemiz degen úmitimiz bar", — dedi Elbasy.
Aita ketsek, Nursultan Nazarbaevtyń "Bolashaqqa baǵdar: Rýhani jańǵyrý" atty baǵdarlamalyq maqalasynyń jariialanǵanyna bir jyl boldy. Osy maqalada prezident álemdegi eń úzdik júz kitapty qazaq tiline aýdarýdy tapsyrǵan edi.
Búginde alǵashqy 18 kitap pen oqý quraly jaryqqa shyǵyp otyr. Oqýlyqtar filosofiia, áleýmettaný, psihologiia, til bilimi, ekonomika, menedjment, dintaný, antropologiia, jýrnalistika baǵyttary boiynsha aýdarylǵan.
Oqýlyqtardyń árqaisysy 10 myń danamen basylyp, aldaǵy bir aida joǵary oqý oryndary men kitaphanalarǵa tegin taratylmaq.
Alǵashqy oqýlyqtardyń ishinde Derek Djonstonnyń «Filosofiianyń qysqasha tarihy. Sokrattan Derridaǵa deiin»; Entoni Kennidiń «Batys filosofiiasynyń jańa tarihy. Antika filosofiiasy» I-tomy jáne «Batys filosofiiasynyń jańa tarihy. Orta ǵasyr filosofiiasy» II-tomy; Remi Hesstiń «Filosofiianyń tańdaýly 25 kitaby»; Devid Brinkerhof, Roýz Ýeits, Siýzan Orteganyń «Áleýmettaný negizderi»; Djordj Rittser, Djeffri Stepnitskidiń «Áleýmettaný teoriiasy»; Elliot Aronsonnyń «Kópke umtylǵan jalǵyz. Áleýmettik psihologiiaǵa kirispe»; Dýein Shýlts, Sidnei Ellen Shýltstiń «Qazirgi psihologiia tarihy»; Devid G. Maiers, Jan M. Týenjdiń «Áleýmettik psihologiia»; N. Gregori Menkiý, Mark P. Teilordyń «Ekonomiks»; Donald F. Kýratkonyń «Kásipkerlik: teoriia, protsess, praktika»; Rikki Ý. Griffinniń «Menedjment»; Karen Armstrongtyń «Iýdaizm, hristiandyq pen islamdaǵy 4000 jyldyq izdenis: Qudaitaný baiany»; Viktoriia Fromkin, Robert Rodman, Nina Haiamstyń «Til bilimine kirispe»; Svetlana Ter-Minasovanyń «Til jáne mádenietaralyq kommýnikatsiia»; Alan Barnardtyń «Antropologiia tarihy men teoriiasy»; Klaýs Shvabtyń «Tórtinshi indýstriialyq revoliýtsiiasy» bar.
