Elge investitsiia tartý jumysyn Úkimet músheleri bir kisidei atqarýy kerek. Búgin Úkimettiń keńeitilgen otyrysynda QR prezidenti Nursultan Nazarbaev osyndai tapsyrma júktedi, dep habarlaidy QazAqparat tilshisi.
«Indýstriialandyrýdyń ekinshi besjyldyǵy shegine jetip keledi. 1250 jobanyń elimizdegi ónerkásipti damytýda mańyzdy ról atqarǵanyn bilesizder. Eldiń úshinshi jańǵyrýy úshin jyl saiyn jalpy ishki ónimniń 30 paiyzyn negizgi kapitalǵa investitsiialaýymyz kerek. Sońǵy jyldary bizde bul kórsetkish 20 paiyzdyń mańynda bolyp qaldy. JIÓ-degi nesieniń úlesi de tómen - 25 paiyz deńgeiinde qalyp otyr. Grýziiada bul kórsetkish 58 paiyzǵa, Reseide 53 paiyzǵa teń bolsa, bizde bar-joǵy - 25 paiyz. Bul jerde másele naqty sektorǵa salynǵan investitsiianyń azdyǵynda. Ulttyq bank bul rette belsendilik tanytyp, eń aldymen ekonomikalyq ósimge atsalysýy kerek», - dedi Prezident Úkimettiń keńeitilgen otyrysynda.
Memleket basshysy Premer-ministr Baqytjan Saǵyntaev men Ulttyq bank tóraǵasy Aqyshevqa naqty sektordaǵy infraqurylymdyq jobalardy qarjylandyrýda júieli sheshim tabýdy tapsyrdy.
«Ár ýaqytta kelise jumys isteýdiń jetispei jatqany baiqalady. Sender ártúrli Úkimette jumys isteisińder me, álde bir eldiń ishinde jumys atqarasyńdar ma? Ainalaǵa «óz isimdi qatyrsam boldy, basqalarda sharýam joq» degen ustanymmen qaraýdy qoiý kerek. Sol sebepti, máseleni naqty kelisilgen jumys arqyly sheshken jón. Álemde investitsiialar úshin qyzý báseke qalyptasqan. Sol sebepti, damyǵan elderdiń investorlaryna basa mańyz bere otyryp, investitsiia tartýdyń keshendi ekojúiesin qalyptastyrý mindeti qoiylyp otyr», - dedi Prezident.
Memleket basshysy óz sózinde Syrtqy ister ministri qyzmetindegi Beibit Atamqulovqa mekemelerden ákimdikke deiingi jumysty úilestirý mindeti berilip otyrǵanyn atap ótti.
«Biraq, bul jumyspen tek sol ǵana (Atamqulov - avt.) ainalysýy kerek dep oilap qalmańdar. Bul - búkil Úkimettiń ortaq mindeti. Al ol óz múmkindikterin elshilikter arqyly qoldanady. Bári de jumys isteýi kerek», - dedi Nursultan Nazarbaev.
