Elbasy Qazaqstan Respýblikasy Ulttyq ǵylym akademiiasynyń jalpy jinalysynyń saltanatty sessiiasyna qatysty, dep habarlaidy "Ult aqparat" Aqordanyń baspasóz qyzmetine silteme jasap.
Memleket basshysy sessiiaǵa qatysýshylardy Ulttyq ǵylym akademiiasynyń 70 jyldyǵymen quttyqtap, onyń zamanaýi Qazaqstandy damytýǵa qosqan úlesin atap ótti.
– Búginde Ǵylym akademiiasy salalyq jáne óńirlik bólimsheleri bar iri ziiatkerlik ortalyqqa ainaldy. Bul rette ol Frantsiia, AQSh jáne basqa da elderdegi ǵylym akademiialary siiaqty ǵylym úshin jat nársemen – ákimshilendirýmen ainalyspaidy. Ǵylym salasyn ortalyqtandyrýdyń, onda qalyptasatyn monopoliianyń tiimsiz ekenin álemdik tájiribe kórsetip otyr, – dedi Qazaqstan Prezidenti.
Nursultan Nazarbaev Qazaqstan ǵylymynyń qalyptasýyndaǵy Akademiianyń eńbegin erekshe atap ótip, elimizdiń ǵylymi áleýetin «Qazaqstannyń úshinshi jańǵyrýy: jahandyq básekege qabilettilik» atty joldaýdy iske asyrýǵa paidalanýdyń mańyzdylyǵyna nazar aýdardy.
Sonymen birge, Elbasy otandyq basqarý júiesi men ǵylymi qyzmetti úilestirýge qatysty birneshe ózekti máselege toqtaldy.
– Biz ǵylymdy ortalyqsyzdandyrdyq. Kóptegen bóligin joǵary oqý oryndaryna berdik, alaida olardyń bári áli innovatsiialyq ortalyqtarǵa ainala qoiǵan joq. Qazaqstannyń ǵalymdary óz jumystaryn belsendi túrde patentteýde. Biraq olardyń basym kópshiligine suranys joq. Ǵylym negizinen memleket esebinen qarjylandyrylýda. Is júzinde naqty sektordan tapsyrys túspei jatyr. Sonymen qatar, ǵylymi jumystarda plagiat jii kezdesedi, – dedi Memleket basshysy.
Osyǵan orai Qazaqstan Prezidenti otandyq ǵylymdy damytýǵa qatysty ustanymdardy túbegeili ózgertýdi tapsyryp, osy baǵytta birqatar naqty mindetter belgiledi.
– Biz ǵylymi jáne ǵylymi-tehnikalyq qyzmet nátijelerin kommertsiialandyrý týraly zań qabyldadyq. Endi osy zań tolyqqandy qoldanylýy qajet. Ǵylymi-zertteýshilik qyzmet nátijelerin qazaqstandyq kásiporyndardyń qajettilikterine baǵyttaityn tetikter engizý kerek. Bizdiń aldymyzda importty almastyrý jáne eksporttyq óndiristi damytý mindeti tur, – dedi Nursultan Nazarbaev.
Budan bólek, Qazaqstan Prezidenti akademiianyń áleýetin paidalana otyryp fýndamentaldy jáne gýmanitarlyq ǵylymi jobalar saraptamasynyń sapasyn jaqsartý qajettigin aitty.
– Ǵylymdy basqarýdyń, ony qarjylandyrýdyń jańa format boiynsha jáne ýaqtyly júzege asyrylatyn jańa júiesi engizildi. Sondai-aq, Ǵylym akademiiasy janynan ádep jónindegi alqaly organ qurýdy usynamyn. Ol Ǵalym kodeksin jáne Jariialanymdar ádebi jónindegi kodeksti ázirlep shyǵa alar edi, – dedi Nursultan Nazarbaev.
Memleket basshysy Bilim jáne ǵylym ministrligine Akademiiamen jáne joǵary oqý oryndarymen birge otandyq ǵylymi basylymdardy halyqaralyq reitingtik bazalarda ilgeriletý jumystaryn júzege asyrýdy tapsyrdy.
Sondai-aq, Qazaqstan Prezidenti álemdik deńgeidegi ǵylymi ortalyqtarda taǵylymdamadan ótý úshin úzdik zertteýshilerge qosymsha granttar taǵaiyndaý, sonymen birge Ortalyq Aziia elderiniń jas ǵalymdaryna Qazaqstanda ǵylymi zertteý júrgizý úshin grant bólý máselesin zerdeleý jóninde tapsyrma berdi.
