QR Tuńǵysh Prezidenti Nursultan Nazarbaev «Eýraziia ekonomikalyq odaǵy Qazaqstannyń úmitin qanshalyqty aqtady?» degen suraqqa jaýap berdi, dep habarlaidy QazAqparat.
«Belovej ormanyndaǵy kóshbasshylar kezdesýinen keiin Sovet odaǵy tarap ketti. Osydan keiin jan-jaqqa bytyrai qashyp ketpes úshin qandai da bir uiym qurýdy usyndym. Balqan túbindegi oqiǵa bizde qaitalanbasyn degen oida edim. Osylaisha, Táýelsiz memleketter dostastyǵy quryldy. Ol uiymnyń da bizdiń eski astanamyz – Almatyda 1991 jyldyń 21 jeltoqsanynda qurylǵanyn eske salǵym keledi», - dedi Nursultan Nazarbaev Astana Club otyrysynda.
Elbasy kezinde bir odaqta bolǵan memleketter arasyndaǵy ekonomikalyq bailanysty saqtap qalýy kúsh salynǵanyn eske aldy.
«Sovet odaǵynda úlken kooperatsiia boldy. Onsyz bailanystyń bári úzilip qalatyn. Kásiporyndar toqtap, adamdardyń bári jumyssyz qala bastady. Alaida bolmaityn dúnie bolmai qaldy. Táýelsizdigin jariialaǵannan keiin ár el óz jolymen kete bardy. Osylaisha, TMD kezdesýleri – prezidentterdiń klýby bolyp qaldy, kezdesip, sóilesedi de ketedi. Jartysy qujatqa qol qoisa, jartysy óz betimen ketetin. Sol sebepti ártúrli jyldamdyqtaǵy integratsiia kerek dep oiladym: qalasa, qosylady, qalamaǵany ózi biledi. Eýropalyq odaq ta bir kúnde quryla salǵan joq qoi. Qazir onda da áli kúnge deiin problemalar barshylyq. Sol sebepti men sonaý 1994 jyly Eýraziialyq ekonomikalyq odaqty qurý jóninde usynys aitqan edim», - dedi ol.
Nursultan Nazarbaev Qazaqstan, Resei, Belarýs elderi birigip, aqyry Eýraziia ekonomikalyq odaǵy qurylǵanyn atap ótti.
«Odaq – ekonomikalyq. Oǵan ýaqyt óte kele Qyrǵyzstan men Armeniia endi. 2014 jyly Eýraziialyq ekonomikalyq odaqty qurdyq. 2014 jyldan bergi bes jyl – jahandyq deńgeide eń sátti ýaqyt boldy dep aitý qiyn. Sanktsiialar men saýda soǵystary boldy. Onyń bári bizge áser etedi. Osyǵan qaramastan, bizdiń kezdesýler turaqty túrde ótkizilip, biz atalǵan odaqtyń ekonomikalyq komissiiasyn qurdyq. Sot, kedendik keńistik quryldy. Qujattardy bekitý arqyly alǵa jyljyp kelemiz. Eshkim de muny paidasyz demeidi. Paidaly ekenin kórip otyrmyz», - dedi Tuńǵysh Prezident.
Nursultan Nazarbaev memleketter arasyndaǵy ózara saýda artyp kele jatqanyn, baiaý bolsa da ónerkásiptik kooperatsiia da óskenin atap ótti.
«2025 jyly kólik pen gazdyń, elektr qýatynyń ortaq naryǵyn quramyz dep kelistik. Bul - óte mańyzdy sharýa. Oǵan da kelemiz. Bul bizdiń ary qarai damýymyzǵa ońtaily jaǵdai jasaidy. Jaqynda Sankt-Peterbýrgte kezekti kezdesý uiymdastyrylady. Áriptesterim - Eýraziia ekonomikalyq odaǵyna kiretin elderdiń basshylary meni qurmetti tóraǵa dep sailady. Sondyqtan, biz Eýropa odaǵymen kelisim jasasaq deimiz. Eýraziia ekonomikalyq odaǵy men Eýropalyq odaq arasyndaǵy bailanys arqyly saýda múmkindikterin ashýǵa bolady. Keiin ary qarai da jylji alamyz. Eýraziialyq ekonomikalyq odaqtyń bolashaǵy zor dep oilaimyn», - dedi ol.
Nursultan Nazarbaev Aýǵanstan ekonomikalyq odaqqa múshe elderdiń bárin qyzyqtyryp otyrǵanyn tilge tiek etti.
«Ol - bizge kórshi memleket. Osy jyldar aralyǵynda Qazaqstan ol elge úlken kómek kórsetti. Myńdaǵan aýǵanstandyq stýdent ártúrli mamandyq iesi atanyp, bizde oqyp jatyr. Bul jumys jalǵasady. Aýǵanstannyń dál qazir Eýraziia ekonomikalyq odaǵyna kiretindei jaǵdaiy bolyp turǵan joq. Ol jaqta soǵys bolyp jatyr. Álbette, Aýǵanstannyń bizben bolǵany jaqsy bolar edi», - dep túidi Elbasy.
