Nursultan Nazarbaev Estoniia Respýblikasynyń Premer-Ministri Iýri Rataspen kezdesti, dep habarlaidy "Ult aqparat" Aqordaǵa silteme jasap.
Kezdesý barysynda taraptar eki memlekettiń tsifrlandyrý jáne innovatsiialyq tehnologiialar salasyndaǵy yntymaqtastyǵyn nyǵaitý perspektivalaryn talqylady, sondai-aq saýda-ekonomika qarym-qatynastaryn damytý máseleleri jóninde pikir almasty.
Memleket basshysy «Astana Hab» IT-startaptar halyqaralyq tehnologiialyq parkiniń ashylý rásimine qatysqany úshin Estoniia Respýblikasynyń Premer-Ministrine rizashylyq bildirdi.
Qazaqstan Prezidenti Estoniianyń tsifrlyq tehnologiialar salasyndaǵy tájiribesi mol ekenin atap ótti.
Nursultan Nazarbaev eki el arasyndaǵy saýda bailanystaryn nyǵaitý qajettigin aityp, ekonomikalyq yntymaqtastyqty damytýdyń basym baǵyttaryna toqtaldy. Memleket basshysy elimizde iske asyrylyp jatqan infraqurylymdyq baǵdarlamalar men solardyń aiasynda boi kóterip kele jatqan nysandar jáne kólik-tranzit áleýetin arttyrý jónindegi jobalardyń nátijeleri týraly aitty.
Sonymen qatar, Memleket basshysy qaita óńdeý jáne agrarlyq ónerkásip, farmatsevtika salalarynda jáne ekonomikanyń basqa da sektorlarynda yntymaqtastyqty bir jolǵa qoiýdyń mańyzdy ekenin atap ótti.
Estoniia Respýblikasynyń Premer-Ministri qonaqjailyq kórsetkeni úshin Qazaqstan Prezidentine alǵys aityp, óziniń Astanaǵa alǵashqy saparynan alǵan áserin ortaǵa saldy.
– Keshe Premer-Ministr Baqytjan Saǵyntaevpen syndarly kelissóz júrgizdik. Men Qazaqstanǵa alǵash ret kelip otyrmyn. Astananyń infraqurylymdyq nysandaryna qarap, elderińizdiń qalai damyp kele jatqanyn kórýge bolady, – dedi Iu.Ratas.
Estoniia Respýblikasynyń Premer-Ministri tsifrlandyrý jáne kólik-logistika salalarynda birlesken jobalardy iske asyrýǵa, sondai-aq investitsiialyq yntymaqtastyqty keńeitýge múddelilik tanytty.
