Elordada keshe bastalǵan VIII Azamattyq forým búgin de jalǵasyn tapty. «Azamattyq qoǵam jáne memleket: Dialog. Áriptestik. Senim» taqyryby arqaý bolǵan búgingi jiynǵa Qazaqstan prezidenti Nursultan Nazarbaev qatysyp otyr. Memleket basshysy óz sózinde elimizde Jetimder úii bolmaýy kerektigin aitty, dep habarlaidy Baq.kz agenttigi.
«Búgingi basqosýda naqty-naqty usynystar aitylyp jatyr. Bul kóterilgen problemalardyń bárin muqiiat saraptap, Úkimetpen, Parlamentpen, Úkimettik emes qoǵamnyń jumyskerlerimen birge tiisti baǵdarlama qabyldaý qajet. Bul jerde barlyǵy qarajatqa bailanysty, barlyǵy aqsha kerek deidi. Ol durys árine. Biraq, barlyǵy bunymen sheshilmeidi», - dedi Nazarbaev.
Elbasy forýmda sóz sóilegen BI Group Direktorlar keńesiniń tóraǵasy Aidyn Raqymbaevty atap ótti. Prezident BI Group jasap jatqan jumystaryn órkendetý kerektigin aitty.
Búgingi jiynda Aidyn Raqymbaev elimizde Analar úileri ashylyp, osy arqyly jetimder azaiyp kele jatqanyn aitqan bolatyn. Jalpy, jetimder máselesin kótergen edi.
«Qazir kóptegen biznesmender qaiyrymdylyqpen ainalysady. Analar úii, jetimder meni óte qatty alańdatady. Men Qazaqstanda Jetimder úileri bolmaý kerek dep esepteimin. Al olardy qalai boldyrmaý kerektigin, qandai jolmen júrý qajettigin ol (Aidyn Raqymbaev-avt.) kórsetip otyr. Bizdiń balalarymyz muhittyń ar jaǵyndaǵy tanymaityn úige baryp, erteń bóten bolyp ketedi. Óskende báribir elin, jerin saǵynady. Biraq, olar bóten adam bolyp keledi, bul belgili ǵoi. Qolymyz oǵan tigen joq, qarajatymyz bolǵan joq, memleket qiyn-qystaý zamanda júrgende bul máseleni biz jiberip aldyq. Biraq, ózimizdiń musylman dininde de, qazaqta da «jetimge qolyńdy sozsań, jumaqqa barasyń» degen sóz bar ǵoi. Óziniń eki-úsh balasy bar adam taǵy bir balany Balalar úiinen alatyn bolsa, tek qana jaqsylyqqa ie bolady dep sanaimyn», - dedi Nursultan Nazarbaev.
