Keńeske Prezident Ákimshiliginiń basshysy Á.Jaqsybekov, Prezidenttiń kómekshisi – Qaýipsizdik keńesiniń hatshysy V.Jumaqanov, Bas prokýror J.Asanov, Memlekettik kúzet qyzmetiniń bastyǵy A.Kúreńbekov, Qorǵanys ministri S.Jasuzaqov, Ishki ister ministri Q.Qasymov, «Syrbar» syrtqy barlaý qyzmetiniń direktory Ǵ.Baijanov, Astana qalasynyń ákimi Á.Isekeshev, «Astana EKSPO-2017» UK» AQ basqarma tóraǵasy A.Esimov, Ulttyq qaýipsizdik komiteti tóraǵasynyń birinshi orynbasary S.Ábish qatysty.
Basqosýda «EKSPO-2017» halyqaralyq kórmesin ótkizýdiń jalpy tártibi jáne ony ótkizý kezinde elorda turǵyndary men qonaqtarynyń qaýipsizdigin qamtamasyz etý máseleleri qaraldy.
Memleket basshysy aldaǵy is-sharany daiyndaý jáne ony sapaly ótkizý úshin aýqymdy jumystar atqarylǵanyn atap ótti.
– Biz kóńil tolqytarlyq sátke – kórmeniń ashylýyna taiap qaldyq. Qazaqstannyń astanasyna keletin qonaqtar sany kóp bolady. Búginde «EKSPO-2017» kórmesine 1,2 million bilet satylǵan eken. Bul – biz kútkendegiden áldeqaida kóp, – dedi Memleket basshysy.
Nursultan Nazarbaev álemdegi jaǵdaidyń turaqsyz ekenin eskere otyryp, kórmeni ótkizý kezinde qonaqtar men el azamattarynyń qaýipsizdigin Astanada ǵana emes, barlyq óńirimizde de joǵary deńgeide qamtamasyz etý mańyzdy ekenin atap ótti. Bul úshin ár basshyǵa jeke jaýapkershilik júkteledi.
Memleket basshysy keńes qorytyndysy boiynsha birqatar tapsyrma berdi.
