Nursultan Nazarbaev Ulttyq dombyra kúnine arnalǵan kontsertke bardy, dep habarlaidy "Ult aqparat" Aqordaǵa silteme jasap.
Memleket basshysy elorda turǵyndary men qonaqtary aldynda sóilegen sózinde barsha qazaqstandyqtardy Ulttyq dombyra kúnimen quttyqtap, bul mýzykalyq aspap qazaq halqynyń mádenieti men tarihynda airyqsha oryn alatynyn aitty.
– Jaqynda meniń jarlyǵymmen shildeniń birinshi jeksenbisi Ulttyq dombyra kúni dep jariialanǵanyn bilesizder. Búgin bul merekeni elimizdiń barlyq óńiri atap ótýde. Dombyra – qazaqtyń jany, rýhy, tarihy, salt-dástúri, búkil bitim-bolmysy, – dedi Qazaqstan Prezidenti.
Elbasy búginde dombyra qazaqtyń brendi bolyp sanalatynyn atap ótti.
– «Rýhani jańǵyrý» baǵdarlamasy arqyly ulttyq mádenietimizdi álemge tanytýǵa dombyra erekshe úles qosady. Qurmanǵazy men Dáýletkereidiń, Táttimbet pen Súgirdiń, Qazanǵap pen Dinanyń kúileri – tól mádenietimizdiń biregei úlgileri, – dedi Nursultan Nazarbaev.
Memleket basshysy dombyra men kúidiń IýNESKO sheshimimen adamzattyń materialdyq emes mádeni muralarynyń tizimine engenin aitty.
– Bizdiń mádeni qundylyqtarymyz ben dástúrimiz qos ishektiń úni men kúmbirlegen kúi arqyly urpaqtan-urpaqqa beriledi. Ulttyq dombyra kúniniń Astanada – táýelsiz Qazaqstannyń júreginde dúniege kelýiniń simvoldyq máni bar, – dedi Nursultan Nazarbaev.
Sońynda Memleket basshysy Ulttyq dombyra kúni óskeleń urpaqtyń qasietti dombyraǵa, ulttyq ónerge degen qulshynysyn arttyra túsetinine senim bildirdi.
«Qazaq eli» alańynda ótken is-shara barysynda dirijer Aitqali Jaiymovtyń jetekshiligimen 2 myńnan astam ónerpaz bir orkestr retinde dombyramen qazaqtyń belgili kúilerin oryndady.
Kontsertten keiin Qazaqstan Prezidenti qoldanbaly óner týyndylarynyń kórmesin aralap kórdi.
