Qazaqstan Prezidenti Dańq memorialyna gúl shoǵyn qoiý rásimine qatysty, dep habarlaidy "Ult aqparat" Aqordaǵa silteme jasap.
Memleket basshysy sap túzegen Qurmetti qaraýylmen birge Dańq memorialyndaǵy máńgilik alaýǵa gúl shoǵyn qoiyp, Uly Otan soǵysynda qaza tapqan bozdaqtar rýhyna bir minýt únsizdik arqyly taǵzym etti.
Elbasy ardagerler men rásimge qatysýshylarǵa arnalǵan quttyqtaý sózinde qazaqstandyqtardyń fashistik basqynshylardy jeńýge zor úles qosqanyn erekshe atap ótti.
– Qazaqstannan maidanǵa 1 million 800 myńnan astam jaýynger attandy. Solardyń jartysy qaityp oralmady. Olar soǵysta eren erlik kórsetti. 500 otandasymyz Keńes Odaǵynyń Batyry atandy. Tyl eńbekkerleri maidanǵa qarý, azyq-túlik jáne kerek-jaraq jóneltý úshin kúndiz-túni tynymsyz jumys istedi, – dedi Nursultan Nazarbaev.
Qazaqstan Prezidenti surapyl soǵysty kórmegen qazirgi urpaqtyń baqytty ekenin aitty.
– Bizdiń atalarymyz revoliýtsiia men repressiiany, ákelerimiz Uly Otan soǵysyn bastan ótkerdi. Al bizdiń urpaq beibit zamanda ómir súrýde. Buǵan ardagerlerimizdiń qosqan úlesi zor. Sizderge alǵysymyz sheksiz! – dedi Memleket basshysy.
Rásim sońynda Elbasy soǵys jáne eńbek ardagerlerimen erkin áńgimelesti.
– Sizder janymyzda júrgende, bizder – balalaryńyz ben nemerelerińiz, ózimizdi alańsyz sezinemiz. Erlikterińizdi úlgi-ónege tutyp, sizderden qaisarlyqty, Otanymyzdyń patrioty bolýdy, Atamekendi súiýdi, sondai-aq Otanymyz úshin qasyq qanymyz qalǵansha kúresip, súiikti Qazaqstanymyz úshin janymyzdy qurban etýge daiyn bolýdy úirenemiz. Qymbatty dostar, barshańyzdy merekelerińizben quttyqtaimyn! Sizderge zor densaýlyq, tabys jáne jaqsylyq tileimin! – dedi Qazaqstan Prezidenti.
Maidangerler Nursultan Nazarbaevqa erekshe iltipaty men qamqorlyǵy úshin shynaiy rizashylyǵyn bildirdi.
