Elbasy Shyǵys Qazaqstan oblysynyń ákimi Danial Ahmetovti qabyldady, dep habarlaidy "Ult aqparat" Aqordaǵa silteme jasap.
Kezdesýde Memleket basshysyna óńirdiń áleýmettik-ekonomikalyq damý barysy týraly esep berildi.
Nursultan Nazarbaev oblys turǵyndarynyń ál-aýqatyn arttyrýdyń mańyzdylyǵyn atap ótip, aimaqtaǵy birqatar ekonomikalyq kórsetkishterdiń oń qarqynmen ósip kele jatqanyn aitty.
Qazaqstan Prezidenti «Rýhani jańǵyrý» jáne oblystyń týristik áleýetin damytý baǵdarlamalaryn sapaly iske asyrý qajettigine basa nazar aýdardy.
– Jalpy, ishki óńirlik ónim kólemi 104 paiyzǵa artty. Ósim deńgeii ónerkásip salasynda 118 paiyzǵa, aýyl sharýashylyǵy boiynsha 107 paiyzǵa jetti. Kózdegen kórsetkishterdiń bárine qol jetkizip kelemiz, – dedi Shyǵys Qazaqstan oblysynyń ákimi.
Sonymen qatar, D.Ahmetov Memleket basshysyna óńirdegi densaýlyq saqtaý salasy boiynsha halyqqa qyzmet kórsetý sapasyn arttyrý úshin qabyldanyp jatqan sharalar týraly málimdedi.
– 2015 jyly onkologiia, kardiologiia, ana men bala, travmatologiia siiaqty 4 baǵyttyń qajetti qural-jabdyqtarmen qamtamasyz etilýin anyqtaý maqsatymen densaýlyq saqtaý salasyna taldaý jasadyq. Sonymen qatar, dárigerler daiarlaýdyń úsh deńgeili júiesin ázirledik. Bul Semei qalasyndaǵy Memlekettik meditsina ýniversitetinde bilim berý, sheberlik synyptaryn ótkizip, shetelde oqytý isin qamtityn bolady. Biz osy jumysty odan ári jalǵastyra beremiz, – dedi Shyǵys Qazaqstan oblysynyń ákimi.
D.Ahmetov bilim berý, aýyz sýmen qamtý, jańa turǵyn úiler salý jáne eldi mekenderdi abattandyrý salalarynda atqarylyp jatqan jumystar jóninde aitty.
Kezdesý sońynda Memleket basshysy birqatar naqty tapsyrma berdi.
