Nursultan Nazarbaev «Nur Otan» partiiasynyń kezekten tys XXI sezine qatysty, dep habarlaidy "Ult aqparat" elbasy.kz saityna silteme jasap.
Jiynda Elbasy «Nur Otan» partiiasy elimizdegi basty saiasi kúsh ekenin atap ótti.
– Partiia árdaiym tutas qoǵamnyń múddesin qorǵap, Táýelsizdigimiz ben memlekettiligimizdi saqtaýǵa atsalysyp keldi. Biz zor tabystarǵa birge qol jetkizdik. Eń bastysy Qazaqstannyń odan ári damýyna berik negiz qalandy. Osy júieli jumysty jalǵastyrý mańyzdy, – dedi Qazaqstannyń Tuńǵysh Prezidenti.
Nursultan Nazarbaev sezdiń tarihi mánine toqtalyp, Qasym-Jomart Toqaevty «Nur Otan» partiiasynyń Tóraǵasy etip sailaý týraly usynysyn partiialastary qoldaitynyna senim bildirdi.
– Keiingi bir jarym jyl ishinde partiia júieli túrde qaita jańǵyrdy. Ony tolyq basqarýdy qazirgi Memleket basshysy Qasym-Jomart Kemeluly Toqaevqa tapsyrý bul protsestiń sońǵy kezeńi dep sanaimyn. Partiiadan prezident sailaýyna usynylǵan jáne qoldaýyna ie bolǵan adam ony basqarýǵa tiis. Búginde Qazaqstan Prezidentiniń basshylyǵymen mańyzdy áleýmettik-ekonomikalyq jáne saiasi reformalar júzege asýda. Barlyq qajetti resýrsy bar «Nur Otan» partiiasy olardy oryndaý barysynda senimdi tirek bolýy kerek, – dedi Elbasy.
Qazaqstannyń Tuńǵysh Prezidenti jurtshylyq jan-jaqty qoldaǵanda ǵana el táýelsizdigin nyǵaitýǵa baǵyttalǵan aýqymdy reformalardan mańyzdy nátijeler bolatynyn aitty.
– El birligi, tynyshtyq, turaqtylyq pen kelisim barda uly maqsattarǵa jetýge bolatynyn árdaiym aityp kelemin. Bizdiń otyz jyldaǵy tájiribemiz osyny aiqyn kórsetti. Búginde Táýelsizdiktiń tórtinshi onjyldyǵyna qadam basyp otyrmyz. Bul – jahandyq ózgerister, kúrdeli ári jaýapty sheshimder kezeńi. Qazaqstan jańa dáýirdiń barlyq synaǵynan súrinbei ótetinine senimdimin. Aiqyn maqsattar, saiasi erik-jiger, eń bastysy halyqtyń qoldaýy sonyń kepili bolmaq, – dedi Nursultan Nazarbaev.
