Memleket basshysy Astanada ótken Qazaqstan halqynyń birligi kúnin toilaýǵa arnalǵan saltanatty sharanyń qonaǵy boldy jáne dástúrli merekelik kontsertti tamashalady.
Aqordanyń baspasóz qyzmeti habarlaǵandai, Nursultan Nazarbaevty Qazaqstan halqy Assambleiasynyń etnomádeni uiymdary men ortalyqtarynyń ókilderi «Qazaq eli» monýmenti aldyndaǵy alańda ózderiniń ulttyq salt-dástúrin kórsetip, án aityp, bi bilep úlken syi-qurmetpen qarsy aldy.
Óz kezeginde, Nursultan Ábishuly eldiń barsha turǵynyn jáne shara qatysýshylary men qonaqtaryn aitýly memlekettik meirammen quttyqtap, tilegin bildirdi.
– Barshańyzdy ortaq meiramymyz – Qazaqstan halqynyń birligi kúnimen quttyqtaimyn. Birliktiń arqasynda biz táýelsiz memleket bola bildik. Bir shańyraq astynda tatý-tátti kún keship kelemiz. Bizdiń birligimizdi bútin ulys dáriptep otyr. Elimizge álemniń túkpir-túkpirinen birligi bekem kópultty memleketti qalai qurý kerek ekenin úirený úshin keletinder bar, – dedi Qazaqstan Prezidenti.
Elbasy elimizdiń úlken jetistikter men jeńisterge kópultty Qazaqstan halqynyń birligi men dostyǵynyń arqasynda qol jetkizgenin tilge tiek etti.
– Birligimizdiń arqasynda biz ozyq damyǵan 30 eldiń qataryna qosylý jáne halyqtyń ál-aýqatyn arttyrý úshin ózimizge aýyr jaýapkershilik júktedik. Halqymyzdyń bereke-birliginiń arqasynda men árbir qazaqstandyqtyń ómir súrý jaǵdaiyn jaqsartýǵa baǵyttalǵan «Prezidenttiń bes áleýmettik bastamasyn» jariia ettim, – dedi Nursultan Nazarbaev.
Sóz sońyndaǵy tilekte Memleket basshysy óskeleń urpaqtyń bolashaǵynyń jarqyn bolýyna niettestik bildirip, ár otbasyǵa tynyshtyq, baq-bereke, amandyq tiledi.
– Biz elimizdegi alýan túrli mádenietterdiń, barlyq tilder men dástúrlerdiń de órkendep kele jatqanyn kórip otyrmyz. Biz – birtutas halyqpyz, bir-birimizdi qurmet tutamyz ári jaqsy kóremiz, ortaq Konstitýtsiia men zańdarǵa baǵynamyz. Bir-birimizdi syilap, dostyq qarym-qatynasta bolý – zor baqyt. Osy birligimizdi saqtap, baqytymyzdyń qadirin bileiik! – dedi Nursultan Nazarbaev.
Bul aýqymdy shara barysynda elordalyq ulttyq-mádeni birlestikterdiń shyǵarmashylyq ujymdarynyń, Astana qalasynyń memlekettik akademiialyq filarmoniiasy ártisteriniń jáne otandyq estrada juldyzdarynyń qatysýymen «Rýhani jańǵyrý – birlik pen tutastyq negizi» atty teatrlandyrylǵan qoiylym kórsetildi.
Osy rette, Ult portaly Nursultan Nazarbaevtyń 1 mamyr – Qazaqstan halqynyń birligi kúnimen quttyqtaýyn da nazarlaryńyzǵa usynady.
Qurmetti otandastar!
Barshańyzdy 1 mamyr – Qazaqstan halqynyń birligi kúnimen shyn júrekten quttyqtaimyn!
Bul shynaiy jalpyhalyqtyq mereke otanshyldyǵymyzdyń, týǵan jerge degen súiispenshiligimiz ben adaldyǵymyzdyń jarqyn simvoly bolyp sanalady. Birlik pen kelisimniń arqasynda biz táýelsiz memleket qalyptastyryp, zor jetistikterge jettik. Álemge tanylyp, biik bedelge ie boldyq.
Birlik pen kelisimniń mańyzdylyǵyn tolyq uǵyný – elimizdiń úilesimdi ári ornyqty damýynyń negizgi faktory.
Birlik, dostyq jáne ózara syilastyq bolǵan kezde ǵana bizdiń keń baitaq ortaq otanymyz – Qazaqstan Respýblikasy mol bailyq pen baq-berekege keneledi. Osy mańyzdy qundylyqtar qoǵamymyzdyń dúnietanymyn anyqtap, onyń odan ári birige jáne jumyla túsýiniń aiqyn baǵdary bolady.
Memleket ómiriniń barlyq salasyndaǵy aýqymdy jańarý jańa belesterdi baǵyndyryp, jeńiske jetý jolynda birligimiz ben turaqtylyǵymyzdy nyǵaitýǵa septigin tigizedi dep senemin.
Barshańyzǵa zor densaýlyq, baq-bereke jáne jańa tabys tileimin!
