Qazaqstan Prezidenti Nursultan Nazarbaev Qytaida ótip jatqan halyqaralyq forýmda "Bir beldeý, bir jol" bastamasyn júzege asyrý boiynsha bes usynys aitty, - dep habarlaidy kaz.tengrinews.kz tilshisi Beijińnen.
Nazarbaev forýmǵa qatysyp jatqan 20 memleket jáne úkimet basshylaryna halyqaralyq árekettestiktiń eń basty bes máselesin qarastyrýdy usyndy.
"Birinshisi, joldardyń ósip kele jatqan tranzit áleýetin tiimdi igerý úshin taýarlardyń ótýin jeńildetetin servis deńgeiin joǵarylatý kerek ári ákimshilik kedergilerdi joiý qajet, bul maqsatta Qazaqstan naqty sharalar qabyldap jatyr. Al buǵan laiyqty saraptamalar men qarjylandyrý qajet. Aziia banki osyndai baǵdarlamalardy belsendi qarjylandyrýy kerek dep esepteimin - bul bolashaqqa investitsiia quiý", - dedi Qazaqstan Prezidenti.
Nazarbaev ekinshi pýnktinde Jibek joly boiyndaǵy azyq-túlik qaýipsizdigin qamtamasyz etý maqsatynda aýyl sharýashylyǵy kooperatsiialaryn damytýdyń mańyzdylyǵyn atap ótti.
"Úshinshiden, biz innovatsiialyq jáne tehnikalyq damý salasynda belsendi áriptestik ornatýǵa jumylýymyz kerek. Ǵylymi-zertteý jáne tájiribe-konstrýktorlyq zertteýler ortalyqtaryn ashýdy birigip qarjylandyrý máselesin qarastyrý oiǵa qonymdy, sondai-aq, innovatsiialyq tehnologiialar kompaniialary men venchýr qorlaryn qarjylandyrý abzal. Osy kontekste dóńgelek ústel qatysýshylarynyń nazaryn qazaqstandyq ǵalymdardyń Jibek joly halyqaralyq ǵylym akademiiasyn qurý boiynsha bastamasyna aýdarǵym keledi. Bul ideiany qytailyq áriptester, sonymen qatar, 16 eldiń ǵylymi mekemeleri qoldady. Bastamaǵa qoldaý kórsetesizder dep úmittenemiz", - dep málimdedi Memleket basshysy.
Elbasy qorshaǵan ortany saqtap qalý máselesine nazar aýdaryp, tórtinshi usynys retinde kólik kúre joly bolatyn qurlyqishi transshekaralyq ózenderdiń sý resýrstaryn tiimdi paidalaný máselesin atady.
"Besinshisi - "Belbeý jáne Jol" ideiasynyń basty damý sharttarynyń biri tartylǵan elderdiń ózara senimi men olardyń teń quqyly ártarapty áriptestikke daiyndyǵy ekeni sózsiz, buǵan osy forýmdy budan keiin de ótkizý yqpal eter edi. Osy protseste Aziiadaǵy senim árekettestigi boiynsha jiyndar jaqsy kómekshi bola alady, onyń aiasynda qaýipsizdik senimi sharalaryn nyǵaitý boiynsha áriptestik tájiribesi mol", - dep qorytty Nursultan Nazarbaev.
Prezidenttiń sózinshe, Qytai "Bir beldeý, bir jol" bastamasyn kóterýi arqyly álemge óńirlik kooperatsiianyń jańa modelin kórsetti. Bul ádis - "birikken damý arqyly turaqtylyqqa qol jetkizý" - halyqaralyq áriptestiktiń jaǵymdy formasy, ol osy jol boiynsha ondaǵan eldiń ekonomikalyq múddesin kórsetedi.
"Jyl saiyn Tynyq muhitynan Atlantikaǵa deiin jańa ári jyldam baǵyttar igerilip jatyr, onyń arqasynda Eýraziianyń ózindegi saýda kólemi 2020 jyly 1,2 trillionnan asady dep boljanyp otyr", - dedi Elbasy.
