Elbasy «Bir beldeý, bir jol» atty halyqaralyq yntymaqtastyq forýmynyń saltanatty ashylý rásimi aiasynda birqatar memleketterdiń kóshbasshylarymen kezdesý ótkizdi, dep habarlaidy "Ult aqparat" Aqordaǵa silteme jasap.
Qazaqstan Prezidenti Qytai Halyq Respýblikasynyń Tóraǵasy Si Tszinpindi forýmnyń tabysty ashylýymen quttyqtap, sáttilik tiledi.
Nursultan Nazarbaev Resei Prezidenti V.Pýtinmen jáne Túrik Respýblikasynyń Prezidenti R.Erdoǵanmen áńgimelesip, taiaýda Astanada ótken Siriia jónindegi kelissózderdiń qorytyndylaryn talqylady. R.Erdoǵan Astana protsesiniń nátijelerine toqtala kele, Siriia máseleleri jónindegi dialogty Jenevada jalǵastyrý úshin onyń mańyzdy bolǵanyn atap ótti.
Sonymen qatar, Memleket basshysy Belarýs Prezidenti A.Lýkashenkomen jáne Ózbekstan Prezidenti Sh.Mirzieevpen, Pákistannyń jáne Malaiziianyń Premer-Ministrleri N.Sharifpen jáne N.Razakpen, Dúniejúzilik ekonomikalyq forýmnyń tóraǵasy K.Shvabpen júzdesti.
Budan bólek Nursultan Nazarbaev BUU Bas hatshysy A.Gýterishpen áńgimelesti. Áńgime barysynda ol Shanhai yntymaqtastyq uiymynyń Astanada ótetin sammitine qatysý nieti bar ekenin rastady.
