Nursultan Nazarbaev belgili memleket jáne qoǵam qairatkeri Manýra Ahmetovanyń qaitys bolýyna bailanysty onyń otbasy men týǵan-týystaryna kóńil aitý jedelhatyn joldady, dep habarlaidy elbasy.kz.
Qazaqstannyń Tuńǵysh Prezidenti Manýra Ahmetovanyń dúnieden ótýine bailanysty aýyr qaiǵyǵa ortaqtasyp, kóńil aitty.
«Manýra Merǵaliqyzy óziniń erekshe talaby men maqsatkerligi, qarymdy qabileti men qajyrly eńbegi arqyly kezinde qazaq áielderi arasynan ministrlik laýazymǵa deiin kóterilgen, Qazaq KSR Ministrler Keńesi tóraǵasynyń orynbasary qyzmetin atqarǵan qairatker tulǵa bolatyn.
Ol elimizdiń ósip-órkendeýine, ásirese áleýmettik salanyń, mádeniet pen ónerdiń, bilim berý men aǵartý isiniń damýyna kóp eńbek sińirdi», – delingen jedelhatta.
Elbasy Manýra Ahmetovanyń ǵibratty ǵumyry urpaqqa árdaiym úlgi-ónege bolyp qala beretinine senim bildirdi.
