QR Parlamentiniń birikken otyrysynda Elbasy Nursultan Nazarbaev qazaqstandyqtardyń páterge qol jetimdiligin arttyratyn «7-20-25» baǵdarlamasy iske qosylatyn málimdedi, dep habarlaidy Baq.kz.
Qos Parlamenttiń birikken otyrysynda Memleket basshysy halyqtyń jaǵdaiyn jaqsartý maqsatynda prezidenttiń 5 áleýmettik bastamasyn usyndy. Aldymen Qazaqstan prezidenti elimizde páter máselesi ózekti kúiinde qalyp otyrǵanyn habarlady.
«Birinshi bastama. Bul – árbir otbasyǵa úi alýǵa jaǵdai jasaý. Biz sońǵy jyldary azamattarymyzdyń úi alý múmkindigin keńeitý úshin kóp jumys istedik. Ótken jyly aýdany 11,2 mln sharshy metr bolatyn turǵyn úi salyndy. Bul - buryn bolmaǵan rekordtyq kórsetkish. Alaida bul atqarylǵan jumystar jetkiliksiz. Áli kúnge deiin kóptegen otbasyda óziniń úii joq. Bul áleýmettik mańyzy bar problemanyń biri. Biz ipotekaǵa qoljetimdilikti arttyryp, osy máseleni sheshý úshin barlyq jaǵdaidy jasaý kerek», - dedi Elbasy.
Osy oraida ol árbir jumys isteitin qazaqstandyqtyń páter alý úshin tiisti jaǵdai jasalatynyn jetkizdi. Ol úshin arnaiy baǵdarlama iske qosylady.
«Árbir jumys isteýshi azamat páter satyp alý úshin tiisti tetikterdi qarastyrýymyz kerek. Ol alǵan qaryzyn otbasylyq biýdjettiń múmkindigin qarastyryp tólep otyrýy qajet. Sondyqtan men «7-20-25» baǵdarlamasyn iske qosýdy usynamyn. Iaǵni bir jumys istep otyrǵan qazaqstandyq ipotekaǵa úi alyp, kelesi talaptar boiynsha úi alatyn bolady. Ipotekalyq nesieniń jyldyq mólsheri 14-16% emes, 7% quraidy. Eger qazirgi tańda bankter ipotekalyq nesieniń mindetti bastapqy jarna 30%, keide 50% talap etse, endi mindetti alǵashqy jarna 20% aspaýy kerek. Al ipoteka 10-15 jylǵa emes, 25 jylǵa berilýi kerek. Bul azamattar tóleitin ai saiynǵy aqshanyń mólsherin azaitady», - dep túiindedi sózi Memleket basshysy.
