Nursultan Nazarbaev Almaty qalasynyń ákimi Baqytjan Saǵyntaevty qabyldady, dep habarlaidy QR Tuńǵysh Prezidentiniń resmi saity.
Megapolis basshysy qala damýynyń 2020 jylǵy qańtar aiyndaǵy negizgi áleýmettik-ekonomikalyq kórsetkishterine toqtalyp, olardyń ári qarai ósý perspektivalary jaily aityp berdi.
Sonymen birge, B.Saǵyntaev Elbasyǵa óndiristi damytý, qurylys, shaǵyn jáne orta biznes, sondai-aq, investitsiia tartý salalaryndaǵy memlekettik jáne salalyq baǵdarlamalardyń júzege asý barysy týraly málimet berdi.
Almaty qalasy ákiminiń málimetinshe, 2020 jyldyń qańtar aiynda investitsiia kólemi 43,2 mlrd teńgeden asty. Ótken jylǵy qańtarmen salystyrǵanda ósim 22 paiyzdy qurady. Bólshek saýda kólemi 7,5 paiyzǵa ósti. Osy jyldyń alǵashqy aiynda qalada 84,4 myń sharshy metr turǵyn úi paidalanýǵa berildi. Bul byltyrǵy qańtardaǵy kórsetkishten 6,7 paiyzǵa artyq.
Elbasy qala basshylyǵynyń atqaryp jatqan jumystarynyń mańyzdylyǵyn atap ótti.
«Ótken jyl jaqsy kórsetkishtermen aiaqtaldy. Almaty – Qazaqstandaǵy eń úlken megapolis. Qalada kóptegen problema bar ekenin bilemin. Ol – ekologiia, kólik, shaǵyn jáne orta biznestiń damýy, kóshi-qon máselesi men halyqty jumyspen qamtý. Bul máseleler bizge burynnan belgili. Olardy júieli túrde sheshý mańyzdy», - dedi Nursultan Nazarbaev.
Sondai-aq, Qazaqstannyń Tuńǵysh Prezidenti ósip kele jatqan qala halqyn áleýmettik nysandarmen – emhanalar, mektepter jáne balabaqshalarmen qamtamasyz etý qajettigine nazar aýdardy.
