Nursultan Nazarbaev Birikken Arab Ámirlikteriniń Qazaqstan Respýblikasyndaǵy Tótenshe jáne Ókiletti Elshisi Muhammed ál-Djabermen kezdesti, dep habarlaidy "Ult aqparat" elbasy.kz-ke silteme jasap.
Kezdesýde Elbasy ekijaqty yntymaqtastyqty nyǵaitýǵa qosqan úlesi úshin Qazaqstandaǵy diplomatiialyq missiiasyn aiaqtap jatqan Muhammed al-Djaberge alǵysyn bildirdi.
– Siz bizdiń elde úsh jarym jyl qyzmet ettińiz. Osy ýaqytta Qazaqstan men BAÁ qatynasy edáýir nyǵaia tústi. Atap aitqanda, memleketter arasynda vizasyz rejim engizildi. Sizdi Qazaqstannyń senimdi dosy dep bilemin. Aldaǵy ýaqytta da jaqsy qarym-qatynasta bolamyz degen senimdemin, – dedi Qazaqstannyń Tuńǵysh Prezidenti.
Óz kezeginde Muhammed ál-Djaber Elbasyǵa jáne barsha Qazaqstan halqyna qonaqjailyq kórsetip, jemisti yntymaqtastyq pen eki el arasyndaǵy qatynastardy damytýda jan-jaqty kómek bergeni úshin alǵys aitty.
– Maǵan baýyrlas Qazaqstan Respýblikasynda elshi bolý mártebesi buiyrdy. Siz ben BAÁ basshylyǵy arasynda dostyq qarym-qatynas ornaǵan. Meniń Qazaqstanǵa jáne onyń halqyna degen yqylasym erekshe. Elden jarqyn jáne umytylmas áser aldym. Diplomatiialyq qyzmettegi alǵashqy laýazymymda «Qazaqstan mektebinen» ótkenimdi maqtan tutamyn, - dedi BAÁ elshisi.
