Qazaqstan Prezidenti Ázerbaijan Respýblikasynyń Prezidenti Ilham Álievpen kezdesti, - dep habarlaidy "Ult aqparat" Aqordaǵa silteme jasap.
Memleketter basshylary resmi kezdesý rásiminen soń «Zagýlba» rezidentsiiasynda shaǵyn qurammen kelissóz júrgizdi.
Kezdesý barysynda saiasi, saýda-ekonomikalyq jáne mádeni-gýmanitarlyq yntymaqtastyqtyń damý ahýaly men perspektivalary, sondai-aq kún tártibindegi halyqaralyq jáne óńirlik ózekti máseleler talqylandy.
Nursultan Nazarbaev Qazaqstan men Ázerbaijan arasynda ejelden tarihi jáne mádeni bailanystarǵa negizdelgen dástúrli dostyq sipatyndaǵy ekijaqty qarym-qatynas qalyptasqanyn atap ótti.
Memleket basshysy álemdik ekonomikadaǵy qazirgi kezdegi jańa úrdister eki el seriktestigin odan ári damytýǵa tyń serpin bere alatynyn aitty.
– Álemdegi daǵdarystyq qubylystar ulttyq ekonomikamyzǵa aitarlyqtai zalalyn tigizip jatqanyn kórip otyrmyz. Sonymen qatar, bul birlesken jańa óndirister ashyp, jasyryn múmkindikterimizdi paidalanýǵa jol ashýda. Ekonomikany ártaraptandyryp, innovatsiialyq tehnologiialarǵa nazar aýdarý qajet, – dedi Qazaqstan Prezidenti.
Nursultan Nazarbaev ekijaqty yntymaqtastyqtyń barlyq salasynda ózara is-qimyldy údetý, sonyń ishinde Qazaqstan men Ázerbaijannyń kólik-tranzit áleýetin damytý qajettigin atap ótti.
– Bul kezdesý elderimizdiń ózara is-qimylyn odan ári tyǵyz damytýǵa múmkindik týǵyzatyn jańa formattaǵy qarym-qatynasymyzǵa tyń serpin berýge tiis, – dedi Memleket basshysy.
Sondai-aq, Qazaqstan Prezidenti eki memlekettiń halyqaralyq saladaǵy ózara túsinistigine jáne ustanymdarynyń uqsastyǵyna nazar aýdardy. Budan bólek, Nursultan Nazarbaev I.Álievti 2016 jylǵy referendýmda Ázerbaijan halqynyń el konstitýtsiiasyna engiziletin, prezidenttiń ókilettik merzimin uzartýǵa baǵyttalǵan ózgeristerdi qoldaǵanymen quttyqtady.
I.Áliev yntymaqtastyqty odan ári nyǵaityp, onyń aiasyn keńeitý jolynda Qazaqstan Prezidentiniń sapary mańyzdy ekenin aitty.
– Búgin qol qoiylǵaly otyrǵan qujattar ekijaqty qarym-qatynasty ári qarai nyǵaitýǵa septigin tigizetinine senimdimin. Qazaqstan biz úshin dostas, baýyrlas el bolyp sanalady. Biz búgingi kezdesýge zor mán berip otyrmyz, – dedi I.Áliev.
Sonymen birge, Ázerbaijan Prezidenti Ilham Áliev Qazaqstannyń Nursultan Nazarbaevtyń basshylyǵymen jetken jetistikterin atap ótti.
