Kommertsiialyq maqsatqa beriletin jer ýchaskeleri týraly aqparattar ashyq bolýy tiis. Bul týraly búgin «Nur Otan» partiiasy Saiasi keńesiniń keńeitilgen otyrysynda Elbasy Nursultan Nazarbaev aitty, dep habarlaidy QazAqparat tilshisi.
Otyrys barysynda Qyzylorda oblystyq kásipkerler palatasynyń direktory Ǵalymbek Jaqsylyqov óńirde kásipkerge barlyq injenerlik jelige bir jerden qosylýǵa ruqsat alýǵa múmkindik beretin geoaqparattyq onlain-qyzmet iske qosylǵanyn aitty.
"Buryn kásipkerler tehnikalyq sharttar alý úshin qalanyń 4 jerinde ornalasqan 4 mekemege baratyn. Sodan keiin oǵan 4 ai ýaqyt ketetin. Qazirgi tańda munyń barlyǵyn onlain-qyzmet arqyly bir jerden úsh kúnniń ishinde alady. Demek, biz kásipkerdiń qarajatyn, ýaqytyn únemdep otyrmyz. Sonyń arqasynda kásipker 4 aida alatyn ruqsatty úsh kúnde alyp jatyr", - dedi Jaqsylyqov.
Osy rette Memleket basshysy mundai qyzmettiń elimizdiń basqa óńirlerinde bar-joǵyn surady.
"Sony basqa óńirlerdiń barlyǵynda nege engizbedi? Álde bar ma? Minekei, Qyzylorda oblysynda engizdi. Aityp otyr, naqty nátijesi bar. Barlyq oblysta qosý kerek. Isker adamdardyń suraityn eń negizgi máselesi osy. Jer degende barlyǵy jabysyp qalady. Sheshpeidi. Anaý da, mynaý da bergisi kelmeidi", - dedi Nursultan Nazarbaev.
Kelesi kezekte Ǵalymjan Jaqsylyqov kommertsiialyq maqsatqa beriletin bos jer ýchaskeleri týraly aqparat, satý nemese jalǵa berý aýktsiondary, oǵan qatysý sharttary barlyq kásipkerler úshin qoljetimdi ári ashyq bolatynyn aitty.
"Ashyq bolýy kerek. Qai jerde jer bar? Qalai satylyp jatyr, kimge satylyp jatyr? Nege oǵan satyldy, basqaǵa nege berilgen joq? Básekelestik jaǵdai boldy ma, bolmady ma? Sonda jemqorlyq ta bolmaidy. Biznesmen men sheneýnik arasynda qatynas bolmaidy. Qashannan beri aityp kelemiz. Muny jalpy sheshýge bolady ǵoi. Osy másele Qyzylordada sheshilgen be?", - dep surady odan Elbasy.
Qyzylorda oblystyq kásipkerler palatasynyń direktory óz kezeginde jyldyń sońyna deiin bul baǵyttaǵy barlyq jumystar onlain formatqa kóshiriletindigin aityp sendirdi.
Osy rette Memleket basshysy: «Atameken» UKP-nyń basqarma tóraǵasy Abylai Myrzahmetovten bul másele barlyq jerde sheshilip jatyr ma?», dep surady.
Myrzahmetovtiń atqarylyp jatqan jumystar jaiyndaǵy esebin tyńdai kele Elbasy: "Sen bárin maqtai berme. Bilemiz ǵoi. Másele tek qana is adamdarynyń jer alyp, jumys isteýinde emes, árqaisysynyń sheneýniktiń artynan júrýinde. Al ol kelgenin jaqsy kórip otyrady. Ol beker kelmeidi. Barlyq pále sol jerde. Bireý birdeńege ruqsat beretin bolsa, sol ruqsat úshin birdeńe jasap ber dep otyrady. Jemqorlyqqa qarsy kúrestiń negizgi máselesi sheneýnik pen is adamdarynyń arasyndaǵy tikelei qarym-qatynasty ajyratý kerek. Barlyq ákimge aitarym osy. Qansha aityp ta kelemiz. Osyny jóndeý kerek", - dep tapsyrdy Nursultan Nazarbaev.
