Qazaqstan Prezidenti «Nur Otan» partiiasynyń ortalyq apparatynda boldy, dep habarlaidy "Ult aqparat" Aqordaǵa silteme jasap.
Memleket basshysy «Nur Otan» partiiasy tóraǵasynyń jańa birinshi orynbasary Máýlen Áshimbaevty tanystyryp, Muhtar Qul-Muhammedke atqarǵan jumysy úshin alǵys aitty.
– Muhtar Qul-Muhammed Qazaqstan Respýblikasy Parlamenti Senatynyń depýtaty bolyp taǵaiyndalýyna bailanysty partiia tóraǵasynyń birinshi orynbasary laýazymynan bosatylady. Osy jaýapty qyzmettegi úlesińiz ben sińirgen eńbegińiz úshin alǵys bildiremin. Osyǵan orai partiia tóraǵasynyń birinshi orynbasary laýazymyna Máýlen Áshimbaevty taǵaiyndaý týraly sheshim qabyldandy. Ol bes jyldan astam Parlament Májilisiniń depýtaty bolyp, komitet basqardy. Men onyń partiia mártebesi men rólin arttyrýǵa úlken úles qosatynyna senimdimin. Jumystaryńyzǵa sáttilik tileimin, – dedi Nursultan Nazarbaev.
Elbasy «Nur Otan» partiiasynyń aldynda turǵan qazirgi mindetterge erekshe nazar aýdardy.
– «Nur Otan» partiiasy memleket saiasatyn aiqyndaityn mańyzdy saiasi kúshke ainaldy. Partiia barlyq baǵdarlamalarymyzdy iske asyrýǵa atsalysyp keledi, – dedi Qazaqstan Prezidenti.
Memleket basshysy barlyq memlekettik jáne salalyq baǵdarlamalardyń sapaly júrgizilip, olardyń iske asyrylýyna baqylaýdy kúsheitýdiń mańyzdy ekenin atap ótti.
Nursultan Nazarbaev ulttyq ekonomikany tórtinshi ónerkásiptik revoliýtsiia jaǵdaiyna beiimdeý qajettigin aitty.
– Eger biz álemdik damýdan qalyp qoimaimyz desek, onda alǵa umtylýymyz qajet. Sol sebepti biylǵy Joldaý osy reformalardy oryndaýǵa baǵyttalǵan. Buǵan deiingi barlyq baǵdarlamalarymyz osyǵan arnalǵan bolatyn. Másele olardyń qalai jumys isteýinde. Biz eksporttyq ónim shyǵaratyn kásiporyndar qurýymyz qajet, – dedi Qazaqstan Prezidenti.
Nursultan Nazarbaev «Nurly jol» infraqurylymdyq damý baǵdarlamasyn iske asyrýdyń ózektiligin atap ótti.
Sońynda Elbasy memlekettik baǵdarlamalardy ázirleý jáne iske asyrý isindegi partiianyń belsendiligin arttyrýdyń mańyzdylyǵyna nazar aýdardy.
– Oblystarda partiia uiymdary bar. Olar belgilengen mindetterdi iske asyrýda belsendi bolýǵa tiis, – dedi Qazaqstan Prezidenti.
