Qazaqstan prezidenti Nursultan Nazarbaev kópbalaly otbasyndaǵy ár balaǵa 21 myń teńge tóleýdi tapsyrdy, dep habarlaidy "Ult aqparat".
"Turmysy tómen azamattarǵa jáne kópbalaly otbasylarǵa kómek kórsetý kerek. Ár qazaqstandyq otbasy júrgizilip jatqan reformalardyń tiimdiligin bolashaqta emes, dál búgin sezinýi tiis. Ásirese, kópbalaly otbasylardy qoldaýdy kúsheitý qajet dep sanaimyn", - dedi Nazarbaev "Nur Otan" partiiasynyń sezinde.
Onyń aitýynsha, elimizde 340 myńnan astam otbasynda keminde tórt bala bar. Jyl saiyn balasy bar otbasylardy qoldaýǵa 500 milliard teńge bólinedi.
"Biraq, ár otbasynyń kirisi ártúrli. Bireýiniki az, bireýiniki ortasha, endi biriniki kóp. Osyny eskerý kerek. Millionerlerge memleketten qosymsha kómek kórsetip ne kerek. Memleket, eń aldymen tabysy tómen kópbalaly otbasylarǵa kómek kórsetýi tiis.
Úkimetke áleýmettik jaǵynan az qamtylǵan azamattardy, ásirese, kópbalaly otbasylardy qoldaý sharalaryn keńeitýdi tapsyramyn. Atalǵan kórsetkishti kúnkóris deńgeiiniń 70 paiyzyna deiin jetkizýimiz kerek.
Ataýly áleýmettik kómek alýǵa quqyly balasy bar otbasylardy qoldaý úshin kópbalaly otbasylarda ár balaǵa eń tómengi tólemdi 21 myń teńge shamasynda bekitýdi tapsyramyn.
Halyq ary-beri shapqylap júrmesin. Sosyn ondai otbasylardyń tabysyn eseptegende basqa áleýmettik járdemaqylardy sanaýdy alyp tastaý qajet. Áitpese, sonyń bárin sanaǵanda kópbalaly otbasylar bai azamattar bolyp shyǵa keledi", - dedi Nazarbaev.
