- Búgin elordada ótip jatqan Qazaqstan Táýelsizdiginiń 25 jyldyq mereitoiyna arnalǵan saltanatty jiynda Elbasy Nursultan Nazarbaev barsha qazaqstandyqty atalmysh merekemen quttyqtady, dep habarlaidy Ult.kz tilshisi QazAqparat agenttigine silteme jasap.
«Qymbatty otandastar! Barshańyzdy elimizdiń eń uly merekemiz ári elimizdiń asqar asýy Táýelsizdiktiń 25 jyldyǵymen shyn júregimnen quttyqtaýǵa ruqsat etińizder. Biz 1991 jyly 16 jeltoqsanda Táýelsizdigimizdi jer júzine jariialap, kúlli álemge pash ettik. Aldymen kóne túrkiniń bórili bairaǵynyń murageri kók týymyzdy BUU tórinde jelbirettik. Ánuranymyzdy álem kóginde áleýettik. Eltańbamyzdy máńgilik mórge ainaldyrdyq. Tól teńgemizdi engizip, Ata zańymyzdy qabyldadyq. Qarýly kúshterimizdi quryp, shekaramyzdy shegendedik. Memlekettik tilimizdi álemniń eń biik minbesinen sóiletkizdik. Biz 1500 jyl buryn Kúltegin tusynda jazylǵan «Máńgilik el» uǵymyn jalpyulttyq ideiaǵa ainaldyryp, eldigimizdiń 15 ǵasyrlyq tamyryna nár berdik. Máńgi jasyl etip gúldendirdik», - dedi Elbasy.
Qazaqstan Prezidenti tereń tarihymyz ben myńjyldyq bolashaǵymyzdy sabaqtastyryp, Máńgilik el bolýdyń dara jolyna túskenimizdi de basa aitty.
«Búgingi ana tilimizdi túletip, ata dinimizdi oraltqan aishyqty elmiz. Taǵylymdy tarihyn túgendegen joraly jurtpyz. Barsha qazaqtyń basyn biriktirgen bátýáli ultpyz. Biz dalamyz ben qalamyzdy birge kórkeitken qýatty halyqpyz. Arqa tósine Táýelsizdiktiń simvoly - Elordamyzdy ornatqan jasampaz jurtpyz. Dostyqtyń dara dástúrlerin damytqan birtutas ultpyz. Kórshimen tatý, shalǵaimen syilas ómir súrýdiń ónegesin kórsetken, saliqaly syrtqy saiasat júrgizgen ulaǵatty ulyspyz. Biz álemdik qarýsyzdaný isiniń tizginin ustaǵan kóshbasshy halyqpyz. Alys bolashaqqa kóz tikken mereili memleketpiz», - dep atap ótti Nazarbaev.
