QR Tuńǵysh Prezidenti – Elbasy Nursultan Nazarbaev álemdegi ahýalǵa alańdaýshylyq tanytty, dep habarlaidy QazAqparat.
«Sońǵy jyldary álemdegi ahýal qarqyndy túrde keri ketip barady. Basty syn-tegeýirin koronavirýs pandemiiasy bolyp tur. Dúniejúzilik densaýlyq saqtaý uiymynyń málimetinshe, qazirdiń ózinde álemde virýs juqtyrǵandardyń sany 250 mln adamnan asyp túsip, 5 mln-nan astam adam ajal qushty. Bul - beibit ýaqyttaǵy jaǵa ustatarlyq statistika. Jahandyq qoǵamdastyq ázirshe virýstyń taralýyn tizgindei almai otyr. Álemdik iri derjavalar arasyndaǵy teke-tirestik kúsheiýi de teris faktorǵa ainalǵan. Ásirese, AQSh pen Qytai kúshtik qurylymdaryn kóbeitip otyrǵan Taivan tóńiregindegi ahýal erekshe alańdaýshylyq týdyrady. Resei men eýropalyq elder arasyndaǵy geosaiasi shielenis te tómender emes. Ýkraina tóńiregindegi janjal saqtalýda», - dep eske aldy Elbasy «Astana klýb-2021» otyrysynda.
QR Tuńǵysh Prezidenti Aýǵanstan tóńiregindegi ahýaldyń da kúrdeli bolyp otyrǵandyǵyna nazar aýdartty.
«Tálipterdiń tez aradaǵy jeńisi men amerikalyqtardyń ketýi bul eldegi ahýaldy túbegeili kúrdelendirip jiberdi. Aýǵanstan taiaý keleshekte-aq aýqymdy gýmanitarlyq apatpen betpe-bet kelýi múmkin. BUU málimetinshe, 23 mln adam nemese aýǵan halqynyń jartysynan kóbi azyq-túlik jetispeýshiliginiń zardabyn tartady. Bul bosqyndardyń jańa tolqynyna túrtki bolýy yqtimal. Tek 2021 jyldyń birinshi jartyjyldyǵynda ǵana olardyń sany 400 myń adamnan asyp tústi», - dedi Elbasy.
Nursultan Nazarbaev iadrolyq strategiialyq turaqtylyq salasyndaǵy jaǵdai da barynsha kúrdeli bolyp turǵanyn, iadrolyq qarý-jaraqty baqylaýdyń jahandyq júiesi kúiregendigin atap ótti.
