Búgin Úkimettiń keńeitilgen májilisinde Qazaqstan Prezidenti Nursultan Nazarbaev agrarlyq ǵylymdy damytý máselesine nazar aýdardy, dep habarlaidy QazAqparat.
«Taǵy bir másele - aýyl sharýashylyǵyndaǵy agrarlyq ǵylymy. Bul da bizde esh damymai otyr. Bizde úsh ýniversitet bar - Almaty men Astanada jáne Batys Qazaqstanda. Olar óz betterimen jumys isteýde. Men muny aittym júrmin. Sonymen birge bul ýniversitetterge tek qyzdardy alady. Qyzdarǵa meniń qarsylyǵym joq, bolǵan da emes. Degenmen, ol qyzdar aýylǵa bara ma?» dep surady Elbasy QR Premer-Ministriniń orynbasary - Aýyl sharýashylyǵy ministri Ómirzaq Shókeevten.
«Iá, soǵan kvota engizeiik dep otyrmyz , aýyldyq jerden keletin stýdentter sany 70 protsent bolýy kerek», - dedi óz kezeginde ol.
Osy rette Memleket basshysy fermerler, aýyl sharýashylyǵy basshylary jastarǵa shákiraqylaryn, granttaryn tólep beretindigin aitty.
«Sodan keiin aýylyna qaityp kelýine jaǵdai jasaý qajet. Qalǵanynyń barlyǵy tamyr-tanystyq nemese UBT-da reitingin tómendetedi de ótpei qalǵandaryn jinap alady. Óitkeni rektor jumys isteýi kerek qoi. Stýdent bolmasa ne isteidi? Muǵalimder ne isteidi stýdentsiz? Áiteýir stýdent bolýy kerek, memleket aqshasyn tólep jatyr», - degen Memleket basshysy Ómirzaq Shókeev máseleni retke keltiretindigine sendirdi.
Sonymen qatar Qazaqstan Prezidenti mal sharýashylyǵynda, mal ónimderin óńdeýde, aýyl sharýashylyǵy ǵylymynda túbegeili ózgerister qajet ekendigin eskertti.
