Qazaqstan Prezidenti Densaýlyq saqtaý ministri Eljan Birtanovty qabyldady, dep habarlaidy "Ult aqparat" Aqordaǵa silteme jasap.
Kezdesý barysynda Memleket basshysyna densaýlyq saqtaý salasyn damytýǵa arnalǵan «Densaýlyq» memlekettik baǵdarlamasynyń iske asyrylýy jóninde aralyq esep berilip, ministrliktiń aldyna qoiylǵan mindetterdiń oryndalýy týraly aqparat usynyldy.
Elbasy aýrý-syrqaýdyń aldyn alý sharalarynyń mańyzdylyǵyn atap ótip, salaýatty ult qalyptastyrý isinde halyqtyń erekshe ról atqaratynyn aitty.
– Azamattarymyzdy ózderiniń densaýlyqtaryn nyǵaitýǵa tartýymyz qajet. Adam densaýlyǵynyń 10-15 paiyzy ǵana meditsinaǵa táýeldi. Qalǵanynyń bári tek ózine bailanysty bolady, – dedi Nursultan Nazarbaev.
Qazaqstan Prezidenti halyq arasynda salaýatty ómir saltyn nasihattaý máselesine toqtalyp, qazaqstandyqtardyń ómir súrýiniń ortasha uzaqtyǵyn 80 jasqa deiin kóterý jónindegi mindettiń ózektiligine nazar aýdardy.
Densaýlyq saqtaý ministri Qazaqstan Prezidentine turǵyndar densaýlyǵynyń negizgi kórsetkishteriniń jaqsaryp kele jatqanyn málimdedi.
– Barlyq kórsetkish boiynsha ahýal turaqty. Ómir súrýdiń ortasha uzaqtyǵy kóterilýde. Ana óliminiń kórsetkishi tómendep keledi. Bala óliminiń kórsetkishi de qatarynan birneshe jyl boiy tómendeýde, – dedi Eljan Birtanov.
Densaýlyq saqtaý ministri halyqtyń densaýlyǵyn jaqsartý boiynsha ministrliktiń qabyldap jatqan sharalary jóninde aityp, aýrý-syrqaý belgilerin bastapqy satyda anyqtaýdyń mańyzdy ekenin atap ótti.
– Qazaqstanda 2012 jyldan bastap tegin dári-dármekpen qamtý jónindegi baǵdarlama júzege asyrylýda. Onyń tiimdiligi óte joǵary. Baǵdarlama aiasynda 2,5 millionǵa jýyq adam aýrýdyń 50 túri boiynsha, sonyń ishinde kúretamyr gipertoniiasy, qant diabeti jáne onkologiialyq aýrýlar boiynsha tegin dári-dármekke qol jetkizip otyr, – dedi E.Birtanov.
Sondai-aq, Eljan Birtanov Nursultan Nazarbaevqa kórsetiletin alǵashqy meditsinalyq qyzmetterdiń sapasyn arttyrý jáne densaýlyq saqtaý júiesine tsifrlyq tehnologiialardy engizý jóninde qabyldanyp jatqan sharalardyń nátijeleri týraly baiandady.
Kezdesý barysynda Memleket basshysy dári-dármek baǵasyn memlekettik retteý jáne farmatsevtika salasyndaǵy sybailas jemqorlyqpen kúres júrgizý máselelerine erekshe toqtaldy.
– Meniń baǵaǵa qatysty máseleni sheshý jóninde bergen tapsyrmamnan keiin Farmatsiia komitetiniń tóraǵasy, «SK-Farmatsiia» kompaniiasynyń basshylyǵy jáne bes oblystyń basqarma basshylary ustaldy. Dári-dármek baǵasynyń negizsiz ósýi sharttar jasasýdaǵy zańnan tys áreketter nátijesinde oryn alady, – dedi Elbasy.
Qazaqstan Prezidenti alǵa qoiylǵan mindetterdiń ýaqtyly iske asyrylýyn qamtamasyz etýdi jáne densaýlyq saqtaý salasyna, sonyń ishinde dári-dármekterdi satyp alý úrdisine tiisti baqylaý ornatýdy tapsyrdy.
Bul rette, Nursultan Nazarbaev E.Birtanovqa ózi basshylyq etetin salaǵa derbes jaýap beretinin eskertti.
