QR Tuńǵysh Prezidenti—Elbasy Nursultan Nazarbaev «Qazaqstan» ulttyq arnasyndaǵy «Túrkistan: Kóne men keleshek kópiri» derekti filminde Túrkistan qalasyn damytýǵa qansha qarajat bólingenin aityp berdi, dep habarlaidy "Ult aqparat".
«Astanany salǵan qarajat baiaǵyda ózin-ózi aqtady, qazir bul qala biýdjetine aqsha quiatyn donor boldy. Sol siiaqty birinshi kezeńde Túrkistanǵa 350 mlrd teńge aqsha jumsalatyn boldy. Onyń 50 paiyzyn jeke menshikter biznes retinde salyp jatyr. Sondyqtan onyń aýyrtpashylyǵy bolmaidy dep oilaimyn. Bul da bir úlken qala bolǵan soń, barlyǵy atsalysady. Sebebi Túrkistannyń turǵan jeri – qalyń jurttyń ortasy, qazaqtyń qaimaǵy buzylmaǵan, ǵuryp-salttardy saqtaityn eldiń ortasy», - dedi N. Nazarbaev.
Onyń aitýynsha, oblys ortalyǵy atanǵan eki jylda 160 nysannyń jartysy salynyp bitti. Onyń ishinde ákimshilik ǵimaraty, qazaq drama teatry, kongresssh hol, 10 myń oryndyq stadion, jastar saraiy bar.
Bas josparǵa sai 2050 jyly Túrkistan turǵyndarynyń sany 500 myńǵa jetýi tiis.
