Germaniiadan orala salysymen Máskeý áýejaiynda ustalyp, bir kúnnen soń 30 kúnge qamalǵan oppozitsiialyq saiasatker Aleksei Navalnyi ózin qamaýǵa sanktsiia bergen sottan keiin reseilikterdi "qoryqpai kóshege shyǵyp, narazylyqqa shyǵýǵa" úndedi. 18 qańtar kúngi sot tyńdaýyn ol “sot júiesin mazaqtaý” dep atady. Qysqa ýaqyt aralyǵynda 2,5 mln ret kórilgen videoda saiasatker Resei biliginiń narazylyqtan qatty qorqatynyn aityp, "men úshin emes, ózderińniń keleshekteriń úshin shyǵyńdar" degen.
Dúisenbi kúni Himki soty Navalnyidy 15 aqpanǵa deiin qamaýda ustaý týraly sheshim shyǵardy. Sol ýaqyt aralyǵynda basqa sot onyń shartty jazasyn túrme jazasyna aýystyrý máselesin qaraidy. 2014 jyly Navalnyi "alaiaqtyq" boiynsha aiyptalyp, 3,5 jylǵa shartty túrde sottalǵan. Quqyq qorǵaýshylar istiń saiasilanǵanyn aitqan.
Halyqaralyq qaýymdastyq Navalnyidy qamaýdy aiyptap, Resei prezidenti Vladimir Pýtinnen ony tez arada bosatýdy talap etti.
18 qańtarda Sankt-Peterbýrgte politsiia "Gostinyi dvor" kesheni aldyna jinalǵan Navalnyidyń ondaǵan jaqtasyn ustady. Osyǵan uqsas ustaýlar Máskeý men Resei astanasy mańyndaǵy Himki eldi mekeninde de bolǵan.
Politsiia 17 qańtarda Germaniiadan ushyp kelgen 44 jastaǵy Kreml synshysy Aleksei Navalnyidy Sheremetevo áýejaiyndaǵy keden beketinen ustaǵan. Tamyz aiynyń sońynda komaǵa túsip, Berlindegi klinikaǵa emdeýge jiberilgen Navalnyi sol jaqta esin jiyp, qyrkúiek sońynda aýrýhanadan shyqqannan keiin Germaniiada saýyqtyrý baǵdarlamasynan ótken. Ol sodan beri Resei aýmaǵyna alǵash ret aiaq basqanda ustalyp otyr.
