گەرمانييادان ورالا سالىسىمەن مەسكەۋ ەۋەجايىندا ۇستالىپ, بٸر كٷننەن سوڭ 30 كٷنگە قامالعان وپپوزيتسييالىق ساياساتكەر الەكسەي ناۆالنىي ٶزٸن قاماۋعا سانكتسييا بەرگەن سوتتان كەيٸن رەسەيلٸكتەردٸ "قورىقپاي كٶشەگە شىعىپ, نارازىلىققا شىعۋعا" ٷندەدٸ. 18 قاڭتار كٷنگٸ سوت تىڭداۋىن ول “سوت جٷيەسٸن مازاقتاۋ” دەپ اتادى. قىسقا ۋاقىت ارالىعىندا 2,5 ملن رەت كٶرٸلگەن ۆيدەودا ساياساتكەر رەسەي بيلٸگٸنٸڭ نارازىلىقتان قاتتى قورقاتىنىن ايتىپ, "مەن ٷشٸن ەمەس, ٶزدەرٸڭنٸڭ كەلەشەكتەرٸڭ ٷشٸن شىعىڭدار" دەگەن.
دٷيسەنبٸ كٷنٸ حيمكي سوتى ناۆالنىيدى 15 اقپانعا دەيٸن قاماۋدا ۇستاۋ تۋرالى شەشٸم شىعاردى. سول ۋاقىت ارالىعىندا باسقا سوت ونىڭ شارتتى جازاسىن تٷرمە جازاسىنا اۋىستىرۋ مەسەلەسٸن قارايدى. 2014 جىلى ناۆالنىي "الاياقتىق" بويىنشا ايىپتالىپ, 3,5 جىلعا شارتتى تٷردە سوتتالعان. قۇقىق قورعاۋشىلار ٸستٸڭ ساياسيلانعانىن ايتقان.
حالىقارالىق قاۋىمداستىق ناۆالنىيدى قاماۋدى ايىپتاپ, رەسەي پرەزيدەنتٸ ۆلاديمير پۋتيننەن ونى تەز ارادا بوساتۋدى تالاپ ەتتٸ.
18 قاڭتاردا سانكت-پەتەربۋرگتە پوليتسييا "گوستينىي دۆور" كەشەنٸ الدىنا جينالعان ناۆالنىيدىڭ ونداعان جاقتاسىن ۇستادى. وسىعان ۇقساس ۇستاۋلار مەسكەۋ مەن رەسەي استاناسى ماڭىنداعى حيمكي ەلدٸ مەكەنٸندە دە بولعان.
پوليتسييا 17 قاڭتاردا گەرمانييادان ۇشىپ كەلگەن 44 جاستاعى كرەمل سىنشىسى الەكسەي ناۆالنىيدى شەرەمەتەۆو ەۋەجايىنداعى كەدەن بەكەتٸنەن ۇستاعان. تامىز ايىنىڭ سوڭىندا كوماعا تٷسٸپ, بەرليندەگٸ كلينيكاعا ەمدەۋگە جٸبەرٸلگەن ناۆالنىي سول جاقتا ەسٸن جيىپ, قىركٷيەك سوڭىندا اۋرۋحانادان شىققاننان كەيٸن گەرمانييادا ساۋىقتىرۋ باعدارلاماسىنان ٶتكەن. ول سودان بەرٸ رەسەي اۋماعىنا العاش رەت اياق باسقاندا ۇستالىپ وتىر.
