Reseidegi jemqorlyqpen kúres qorynyń jetekshisi, oppozitsiialyq saiasatker Aleksei Navalnyi essiz kúide Ombydaǵy aýrýhanalardyń birine jetkizildi. Bul týraly qordyń baspasóz hatshysy Kira Iarmysh habarlady.
Onyń sózine qaraǵanda beisenbi kúni tańerteń Tomskiden Máskeýge qarai ushqan Navalnyidyń jaǵdaiy ushaqta nasharlaǵan. Osyǵan bailanysty ushaq shuǵyl túrde Ombyǵa qonǵan, sol jerde oppozitsiialyq saiasatkerge jedel járdem kóligi shaqyrtylǵan.
Navalnyidyń janynda bolǵan Iarmyshtyń aitýynsha, dárigerler onyń ýlanýy múmkin ekenin aitqan. Iarmyshtyń sózine qaraǵanda Navalnyi tańerteńnen beri sháiden basqa eshnárse ishpegen, sondyqtan eger qastandyq jasalsa, áldekimder onyń "sháiine birnárse qosyp bergen bolýy múmkin".
Baza basylymynyń habarlaýynsha, qazir saiasatker toksikologiialyq reanimatsiia bóliminde jatyr. Áli esin jimaǵan. Dárigerler ony jasandy tynys alý apparatyna qosqan. Dárigerler onyń neden ýlanǵanyn ázirge naqty aita almai otyr.
"Taiga.info" saitynyń habarlaýynsha, Navalnyi birneshe kún Sibirde bolǵan. Ol jaqta jemqorlyqpen kúres biýrosynyń jetekshisi kezekti zertteýine material jinaǵan bolýy múmkin. Ol áýeli Novosibirskige aialdap, eriktilermen kezdesken. Sol jaqtan Tomskige ushqan.
Byltyr shilde aiynda da ruqsat etilmegen aktsiiaǵa qatysty dep aiyptalyp Máskeýdegi tergeý izoliatorynda qamalyp jatqan kezde Navalnyi ýlaný belgileri boiynsha aýrýhanaǵa túsken edi. Ertesinde ony aýrýhanadan shyǵarǵan dárigerler onyń aǵzasynda "ýlaityn zattar tabylmady" dep aitqan. Resmi málimet boiynsha, saiasatkerde allergiia ustamasy bolǵan.
Al Navalnyidyń ózi eshteńege allergiiasy joq ekenin, ony ýlandyrýy múmkin ekenin topshylaǵan. Ol tergeý komitetine aryz túsirgenmen tekserý jumystary júrgizilmedi.
