Naýryz aiynda latyn áripine negizdelgen qazaq álipbiiniń sońǵy nusqasy maquldanady. Bul týraly QR Mádeniet jáne sport ministrligi Til saiasaty komiteti tóraǵasynyń orynbasary Ádilbek Qaba aitty, dep habarlaidy "Ult aqparat".
«Ózderińizge belgili, Memleket basshysy Qasym-Jomart Toqaev latyn álipbiine negizdelgen qazaq álipbiin jetildirý jóninde tapsyrma bergen bolatyn. Osy tapsyrma berilgennen bergi 3-4 aidyń ishinde ǵalymdar 4 otyrys ótkizdi. Sol otyrystarda álipbidiń birneshe nusqasy qaraldy. Jalpy, búginge deiin 40-tan astam álipbi jobasy kelip tústi. Onyń ishinde ǵalymdardyń resmi túrde qaraǵany 30 joba boldy. Barlyq joba nazardan tys qalǵan joq. Barlyǵyn taldap, talqyladyq, qajetti dúnieleri eskerildi. Avtorlaryna jaýap berdik», - dedi ol .
Komitet tóraǵasy orynbasarynyń aitýynsha , atalǵan jobalardyń ishinen tórteýi iriktep alynyp, talqylandy. 4 aqpanda respýblika boiynsha osy jobalar jan-jaqty talqyǵa tústi.
«Ǵalymdardyń pikiri toǵysqan bir másele, burynǵy kirillitsada qansha árip bolsa, sonsha dybys munda da bolýy kerek degen qaǵida jaramaidy. Tilimizde esh qajettiligi joq kirme dybystar da bolǵany málim. Latynǵa kóshýdiń bir máni de sol – kezinde elimiz basynan keshken bodandyq zamanda erkimizden tys engen dybystardan qutylý, til tazalyǵyna qol jetkizý. Buryn 42 qarip bolsa, endi 31 nemese 32 qarip bolýy múmkin. Alaida bul qaripter qazaqtyń ár dybysynyń óz únin, áýezin, aitý, oqý, jazý ereksheligin tolyq bere alady», - dedi Ádilbek Qaba.
Onyń atap ótýinshe, Til saiasaty komitetiniń uiymdastyrýymen buǵan deiin de 14 aqpanda óńirlerdegi Til basqarmalaryn tarta otyryp respýblikalyq ashyq talqylaý ótkizildi. Talqylaýǵa usynylǵan jobalarǵa aimaqtardaǵy filolog ǵalymdar men til mamandary óz pikirlerin aityp, usynystaryn berdi. Osy jáne ózge de talqylaý qorytyndylary negizinde 20 aqpanda Almatyda ǵalymdardyń jumys toby óz otyrysyn ótkizip, usynylǵan birneshe jobanyń árqaisysynyń artyqshylyqtaryn ala otyryp, bir joba jasap, maquldandy.
«Bul másele boiynsha Prezident Ákimshiligi Basshysynyń birinshi orynbasary Máýlen Áshimbaev ǵalymdarmen kezdesip, talqylaý ótkizdi. Sol jerde keibir áripterdi qaita qarap shyǵyp, tolyqtyrýǵa tapsyrma berildi. Bul jobany Prezident Ákimshiliginiń alǵashqy irikteýinen ótti deýge bolady. Tek birdi-ekili kirme dybystarǵa qatysty ortaq pikirge kelý qaldy. Osy aidyń 13-i kúni búkil ǵalymdar bas qosqan úlken otyrys ótkiziledi. Sol otyrysta naqty jetildirilgen álipbi maquldanyp, Úkimette ulttyq komissiianyń qaraýyna beriledi», - dedi ol.
