Qazaqstanda 2022 jylǵy naýryzda jeke sáikestendirý nómirin alǵan reseilikterdiń sany 2021 jylǵy naýryzben salystyrǵanda 14 ese artqan, - dep habarlaidy Tengrinews.kz.
Ishki ister ministrligi ókili byltyr Reseidiń 14 717 azamaty JSN alǵanyn aitty. Al 2022 jyldyń alǵashqy úsh aiynda JSN 12 840 reseilikke berilgen.
Qazaqstanda tirkelgen reseilikter sany 2022 jylǵy naýryzda ósken. Bir ai ishinde 10 995 Resei azamaty JSN alǵan. Al 2021 jylǵy naýryzda 783 adam alǵan, salystyrmaly túrde ósim 14 eseden asady.
Ishki ister ministrliginiń málimetinshe, Ýkraina azamattaryna qatysty shama aitarlyqtai kóp emes. 2021 jyly Qazaqstanda 1087 ýkrainalyq JSN alǵan. Aiyna 70-ten 128 adamǵa deiin tirkelgen. Biyl bul kórsetkish azdap qana ósken. Qańtarda 42 ýkrainalyq JSN alǵan, aqpanda - 80, al naýryzda - 198 adam.
Qazaqstandyqtar jeke sáikestendirý nómirlerin týǵan kezde birden alady. JSN Qazaqstanda 2007 jyly engizilgendikten, búginde barlyq azamattyń jeke kýálikteri men týý týraly kýálikterinde bul nómir bar.
Qazaqstanda sheteldikterge JSN qajet:
- bankte shot ashý qajet bolsa;
- shetel azamaty Qazaqstanda ornalasqan kózderden tabys alatyn bolsa;
- salyq salynatyn múlikti satyp alý kezinde, mysaly, avtokólik;
- Qazaqstan rezidenti - zańdy tulǵanyń basshysy nemese rezident emes - zańdy tulǵa filialynyń basshysy bolyp taǵaiyndalǵan kezde.
Shetel azamattaryna JSN alý úshin Qazaqstanda bolý mindetti emes. Ony senimhat boiynsha jasaýǵa bolady.
