Qazaqstandyqtar biyl 120 kún demalady. Sol 120 kúnniń 14 kúni - naýryzǵa, 10 kúni - mamyrǵa dóp kelip tur. Osy rette demalysta azyraq aqsha jumsaý úshin, iaǵni arzan baǵada demalý úshin qazaqstandyqtarǵa qandai amal qarastyrǵan jón? Bul oraida «Týristik Qamqor» korporativti qory birshama paidaly keńes berip otyr, dep habarlaidy QazAqparat tilshisi.
Korporativtik qor mamandarynyń boljaýynsha, naýryzda qazaqstandyqtar jii demalatyn eń tanymal elder - BAÁ, Tailand, Mysyr, Úndistan, Shri Lanka, Indoneziia, Malaiziia, Vetnam, Iordaniia, Hainan, Dominikan, Kanar araldary, Kýba bolýy múmkin.
«Demalys úshin aldyn ala brondaý qyzmetin paidalanǵan jón. Biraq ádette aldyn ala brondaý keminde úsh aptadan 3-6 aiǵa deiingi merzimdi qamtidy. Sol sebepti sáýir-mamyrdaǵy yńǵaily demalysyńyzdy búginnen oilastyrǵanyńyz jón. Mysaly, túrik, mysyr, tai jáne BAÁ baǵyttaryndaǵy týrlardy aldyn ala brondaǵan kezde (3-6 ai aralyǵy «erte» bolyp esepteledi) Sizge 30-50 paiyzǵa deiin jeńildikter usynady. 60 paiyzǵa deiin jeńildik jasaýǵa daiyn jomart qonaq úiler de bar», - dep keńes beredi korporativti qor.
Jalpy, týrlardy aldyn ala brondaý degen jalpy ne? Mamandardyń aitýynsha, arzan týrdy satyp alý úshin mindetti túrde sońyna deiin sozý jáne ýaqytsha jeńildikpen tez arada satylatyn joldamalarǵa jarmasý mindetti emes ekendigin qazaqstandyqtar áli tolyq túsine qoiǵan joq.
«Kóptegen otandastar úshin shetelde demalý - uzaq ýaqyt josparlanatyn, barlyq usaq-túiek eskeriletin jáne oilastyrylatyn ómirindegi eń mańyzdy oqiǵa sekildi kórinedi. Aldyn ala brondaý senimdilikti, jailylyqty baǵalaityn otandastarymyz úshin yńǵaily. Shynynda brondaý jyl basynda bastalyp, sáýir aiyna deiin jalǵasady. Al kei jaǵdailarda odan da kesh bolýy múmkin. Osyǵan uqsas qyzmet «ystyq» maýsym bastalǵanǵa deiin aldyn ala qonaq úidi tańdaýǵa ǵana emes, sonymen qatar, týroperatordan qomaqty jeńildik alýǵa da múmkindik beretini ras», - deidi mamandar.
Saiahatty jaqsy kóretinderge 2019 jyly Qazaqstan birqatar jańa aviaqatynas ashatynyn da aita ketý kerek. Iaǵni, otandastarymyz úshin jańa múmkindikter men baǵyttar ashylmaq. Jańa aviaqatynastar tikelei bolady, iaǵni ushaqtan ushaqqa aýysyp minip júrmeisiz.
«Praga, Ulan-Batyr men Tokio. Alǵashqy eki baǵytta «Skat» qyzmet kórsetetin bolady. «Skat» aviaparki eki jańa Boingpen tolyqtyrylady. Ulan-Batyrǵa alǵashqy reis 2 maýsymda jasalady. Monǵoliiaǵa bilet satylymy ashyq. Álemniń eń sýyq astanasy Ulan-Batyrdaǵy týristerdiń negizgi ermegi - bi men halyq áni, Opera jáne balet teatrlary. Áigili Shyńǵyshannyń ómir súrgen jáne qyzmet etken jerleri, Monǵoliianyń negizin qalaýshy qolbasshy týǵan Dýlýn-Boldog aýyly boiynsha ekskýrsiialar asa tanymal», - delingen habarlamada.
Sondai-aq, «Skat» jazda Batými, Krasnodar, Sochige aviareisterdi qaita jandandyrady. Osy qalalarǵa arnalǵan tikelei reister Astanadan júzege asyrylady. Sondai-aq, Erevan men Mineraldy sýlarǵa avia reister eskerilgen. Óz kezeginde ázirbaijandyq aviajeliler Baký-Almaty-Baký baǵyty boiynsha jańa aviaqatynastardy ashýǵa niet bildirip otyr. Birinshi reis 2 sáýirde jasalmaq. Ázirbaijandyq tasymaldaýshy Airbus A319 yńǵaily ushaqtarymen aptasyna eki ret (seisenbi men senbi) Almatyǵa ushýdy josparlap otyr.
