Sultan Sársemálievke qatysty sot otyrysynda marqumdardyń týystary olardyń joǵalyp ketkennen keiin WhatsApp-ta bóten adammen hat jazysyp júrgenderin qalai ańǵarǵandaryn aityp berdi , dep habarlaidy ult.kz.
Atyraý oblysynyń qylmystyq ister jónindegi mamandandyrylǵan aýdanaralyq sotynda Jangeldin aýylyndaǵy otbasynyń ólimine qatysty is boiynsha kýágerlerden jaýap alý jalǵasyp jatyr.
Marqum Maqsot Qarabalinniń nemere qaryndasy Parizat Kenjeǵalieva byltyr 12 qarashada aǵasynyń maly men múlki satylyp jatqanyn estip, úiine barǵanyn aitty. Onyń sózinshe, sol kezde aýlada mal tiep júrgen adamdardy kórip, satylymdy toqtatýǵa tyrysqan.
Kýáger bul jaǵdai týraly Naýryz Muqanǵalievtiń WhatsApp nómiri arqyly bilgenin, alaida ol kezde habarlamalardy basqa adam jazyp otyrǵanynan kúmándanbaǵanyn jetkizdi.
Ol úi ieleri joq kezde múlikti satýǵa úzildi-kesildi qarsy bolǵanyn aitty. Keiin birneshe ret videoqońyraý shalýǵa árekettengenimen, eshkim jaýap bermegen.
Sotta kýáger emotsiiasyn jasyra almai, aiyptalýshyǵa qarap: “Ol ólgen adamdy tiriltkendei áreket jasaǵan”, – dedi.
Keiin ol Sársemálievke: “Olardyń kinási ne edi? Basyńdy kóter!” – dep ún qatty.
Sýdia eskertý jasaǵannan keiin Parizat Kenjeǵalieva marqumdardyń eshkimge qaryzy bolmaǵanyn, óz eńbegimen kún kórgenin aitty. Osy sátte ol kózine jas aldy.
Sotta keiin marqum Maqsot Qarabalinniń nemere inisi Shalqar Muqanǵalievten jaýap alyndy.
Onyń aitýynsha, týystary joǵalǵannan keiin ol Naýryz Muqanǵalievke birneshe ret habarlasqan. Bir joly WhatsApp arqyly “qiyndyqtar bolyp jatyr, anam aýyryp qaldy” degen jaýap kelgen.
Alaida ýaqyt óte kele habarlamalar kúdik týdyra bastaǵan.
“Naýryz ádette qate jazatyn. Al bul hattardyń jazylý máneri múlde basqa boldy”, – dedi kýáger sotta.
Shalqar Muqanǵaliev te aiyptalýshyǵa qarata sóz sóilep, eger adam shyn ókinse, Alla keshiretinin, biraq bul oqiǵa kóptegen otbasyǵa orny tolmas qaiǵy ákelgenin aitty.
Ol Naýryzben birge óskenin, onyń eshqashan janjalqoi bolmaǵanyn jetkizdi. Sondai-aq Aqbaiannyń týystary qysym kórsetti degen nusqaǵa senbeitinin aityp, marqumdardy kinálamaýdy surady.
Sot barysynda jańa derekter de jariia boldy. Tergeý málimetinshe, marqumdardyń denesi tabylǵan qora mańynan qan izi bar balta tabylǵan. Biraq saraptama nátijesi ondaǵy qan marqumdarǵa tiesili emes ekenin kórsetken.
Sonymen qatar qylmystan biraz ýaqyt ótken soń úidiń kireberisindegi kilemsheniń astynan qosalqy kilt tabylǵany belgili boldy. Onyń kimge tiesili ekeni jáne qashan qaldyrylǵany ázirge anyqtalmaǵan.
Bul jaittar aldaǵy sot otyrystarynda qosymsha zerttelmek.
