Ózbekstan men Qazaqstan Egemendiginiń 30 jyldyǵyna orai Qaldybek Seidanovtyń «Naýai jáne qazaq ádebieti» kitaby jaryq kórdi, dep habarlaidy "Ult aqparat".
Ózbekstan Respýblikasy Turan ǵylymdar akademiiasynyń jáne Qazaqstan Respýblikasynyń Gýmanitarlyq ǵylymdar akademiiasynyń akademigi Qaldybek Seidanovtyń «Naýai jáne qazaq ádebieti» ǵylymi-zertteý eńbegi shyqty. Úsh bólimnen turatyn kitap Ózbekstan Respýblikasynyń Jazýshylar Odaǵynyń «Adabiet» baspasynda jaryq kórdi.
Eńbektiń birinshi bóliminde «Qazaq-ózbek ózara ádebi bailanystarynyń tarihi tamyrlary» jaily tereń maǵlumattar berilgen, túbi bir týysqan ózbek-qazaq halyqtarynyń ádebi bailanystarynyń tarihi tamyrlary týraly jazylǵan. Ekinshi bólim «Asyl sózdiń atasy» dep atalady. Onda ózbek poeziiasynyń shuǵylaly shyńy, ózbek jazba ádebietiniń negizi qalaǵan A.Naýaidyń ómiri men shyǵarmashylyǵy jaily asa mol maǵlýmattar berilgen.
Sondai-aq, úshinshi bólim «Naýai jáne qazaq ádebieti», «Naýai jáne Abai» dep atalatyn taraýlardan turady. Onda Naýaidyń qazaq halyq aqyndaryna, onyń ishinde, qazaq poeziiasynyń jaryq juldyzy Abaiǵa tigizgen igi yqpaldary jaily oi qozǵalady.
Qoryta aitqanda, kóp jyldyq zertteý eńbek joǵarǵy oqý oryndary filologiia fakýltetiniń bakalavr jáne magistranttar, doktoranttar men mektep muǵalimderine arnalǵan oqýlyq bolýmen birge, jalpy qazaq-ózbek ádebi bailanystaryna qyzyǵatyn oqyrman jurtshylyqqa arnalǵan.
