NATO bas hatshysy Iens Stoltenberg Reseidiń Ýkraina shyǵysyndaǵy "Lýgansk halyq respýblikasy" jáne "Donetsk halyq respýblikasynyń" táýelsizdigin moiyndaý týraly sheshimin aiyptady, dep habarlaidy Azattyq.
21 aqpan kúngi málimdemesinde Stoltenberg prezident Vladimir Pýtinniń sheshimi "Ýkrainanyń táýelsizdigi men territoriialyq tutastyǵyna nuqsan keltirip, qaqtyǵysty sheshýge jumsalǵan bar kúsh-jigerdi zaia etedi jáne [atysty toqtatý týraly - eskertý] Minsk kelisiminiń sharttaryn buzady" dedi.
NATO, AQSh pen batys jetekshileri Reseidi "NATO-ǵa qosylǵysy kelgen Ýkrainany basyp alýǵa tyrysty" dep aiyptaǵan. Ýkrainamen shekarasyna 150 myń áskerin ornalastyrǵan Máskeý shabýyl josparyn joqqa shyǵaryp, NATO men batysty aimaqta jaǵdaidy turaqsyzdandyrdy dep kinálaǵan.
Jýyrda Máskeý NATO-nyń Ýkrainany soltústikatlantikalyq odaqqa múshe retinde qabyldamaityny týraly ýádesin alýǵa tyrysqan jáne Shyǵys Eýropadan qarý-jaraǵy men infraqurylymyn alyp ketý týraly da talap qoiǵan.
21 aqpanda Ýkrainadaǵy separatistik aimaqtardyń "táýelsizdigin" moiyndaý týraly sheshimin jariialaǵan Pýtin NATO Máskeýdiń qaýipsizdik talaptaryn "tutas eskerýsiz qaldyrdy" dep málimdedi.
"Máskeý separatisterdi qarjylyq jáne áskeri turǵyda qoldap, Ýkraina shyǵysyndaǵy qaqtyǵysty ýshyqtyrýyn tyimady. Ol sonymen birge Ýkrainany qaita basyp alý úshin syltaý izdep otyr" dedi Stoltenberg.
