Briýsselde NATO elderi qorǵanys ministrleri AQSh pen Resei orta jáne qysqa qashyqtyqqa arnalǵan zymyrandar týraly kelisimnen birjola shyqqannan keiin álemdegi qaýipsizdik máselesin talqylady.
NATO-ǵa múshe 29 eldiń barlyǵy reseilik zymyrandar Eýropaǵa qaýip tóndiredi dep sanaidy. Alaida NATO Eýropa jerinde jańa iadrolyq qarý júiesin ornatýdy josparlap otyrǵan joq.
Reseiden tónetin qaýip týraly uiǵarymynda NATO óziniń jáne AQSh barlaý qyzmetiniń Máskeý ornalastyryp jatqan utqyr zymyrandardy anyqtaý jáne áýeden qaǵyp túsirý qiynǵa soǵatynyn aitqan qorytyndylaryna súiengen.
NATO bas hatshysy Iens Stoltenbergtiń sózinshe, Resei sońǵy jyldary kelisimge qaishy áreketterge baryp, jańa iadrolyq qarýyn damytýǵa investitsiia bólgen jáne kórshileri Ýkraina men Grýziiaǵa qatysty agressiialyq saiasat ustanyp otyr. Máskeý bul elderdegi janjaldarǵa qatysy baryn joqqa shyǵarady.
Qaterge qarsy turý maqsatynda NATO "4 jáne 30" dep atalatyn jospar qabyldaǵan. Ol boiynsha NATO 2020 jylǵa qarai óz aýmaǵynda 30 áskeri keme, 30 mehanikalandyrylǵan batalon jáne 30 áýe eskadriliasyn ornalastyrady. Bul kúshter kez kelgen qaýip-qaterge 30 kún ishinde jaýap berýge ázir bolmaq.
Stoltenberg NATO dialogqa daiyn ekeni týraly taǵy da málimdep, Reseidi orta jáne qysqa qashyqtyqqa arnalǵan zymyrandar týraly kelisimdi oryndaýǵa shaqyrdy.
