Jýrnalistermen telekonferentsiia formatynda kezdesken NATO-nyń bas hatshysy Iens Stoltenberg "koronavirýs pandemiiasyna qarsy áreket týraly jalǵan aqparat taratty" dep Qytai men Reseidi aiyptady.
- Resei men Qytai ókilderi "NATO músheleri Covid-19 pandemiiasyna qarsy árekette birin-biri qoldamaidy, bul elder qariialaryn qorǵai almaidy, virýstyń taralýyna NATO músheleri jaýapty" dei bastady. Bizdiń qolymyzda Máskeý men Pekinniń shyndyqqa sai kelmeitin, NATO arasynda arazdyq týǵyzýǵa baǵyttalǵan birneshe málimdemeleri tur, - dedi NATO basshysy.
Onyń aitýynsha, taiaýdaǵy telekonferentsiiada NATO elderiniń qorǵanys ministrleri birlesken jumysty kúsheite túsýge ýaǵdalasqan.
Jýrnalisterdiń keibir suraqtary NATO áskerin osy odaqtyń shyǵys qaptalyna ornalastyrý máselesine arnaldy.
Stoltenberg NATO áskerin Baltyq respýblikalarynyń aýmaǵyna ornalastyrý jaily sheshim ózgermeitinin aitty.
- Bul - jai sóz emes, naqty is. Odaqtastardyń áskeri bólimderi Litva, Latviia, Estoniia jáne Polsha aýmaǵyna jetkizildi. NATO aviatsiiasy bul elderdiń áýe keńistigin baqylap, NATO áskeri kemeleri Baltyq teńizinde patrýlde júr, - dedi NATO basshysy.
Iens Stoltenberg odaqtastar áskeriniń úzdiksiz jattyǵý men birlesken is-qimyl jasaýǵa múmkindigi bar ekenin aitty. Áskeri daiyndyqtyń negizgi bóligi áskeri baza ornalasqan jerde ótedi.
"NATO áskeri ózge óńirlerde de missiiasyn jalǵastyrady. Mysaly, Aýǵanstanda bizdiń myń áskeri qyzmetkerimiz aýǵan qaýipsizdik kúshterine qoldaý kórsetip júr. Bizdiń kúshterimiz Kosovo tynyshtyǵyn saqtaýǵa da úles qosyp otyr".
Iens Stoltenberg odaqtastardyń áskeri kemeleri Túrkiia men Eýropa odaǵy arasyndaǵy migratsiia daǵdarysyn eńserý jónindegi kelisimdi oryndaýǵa járdemdesý úshin Egei teńizinde de júrgenin aitty.
