"Reseiden Qazaqstanǵa aǵylatyn týrister sany arta túsedi. Bul týraly búgin Astanada ótken baspasóz máslihatynda National Geographic Traveler jýrnalynyń bas redaktory Olga Iakovina málim etti", - dep habarlaidy Ult.kz tilshisi QazAqparat agenttigine silteme jasap.
«Búginde Qazaqstan týristik salada áleýeti joǵary, perspektivaly ári qyzyǵýshylyq týdyratyn baǵyt ekeni belgili, osy rette búgin álem elderinen týristerdi tartýǵa múmkindikter barshylyq. Atap aitqanda, týrizm men saiahat turǵysynda biz halyqaralyq deńgeidegi reseilik aldyńǵy qatarly basylym retinde bul salada iske asyrylatyn qadamdardan tysqary qalǵymyz kelmedi. Búginde Qazaqstanmen bailanysty birneshe birlesken qyzyqty jobalar iske asyrylýda», - dedi O. Iakovina.
Onyń sózine qaraǵanda, Qazaqstanda sheteldik adamdardy tartatyndai qyzyqty nysandar men eldi mekender kóptep kezdesedi.
«Reseilik týristik sala jaiynda óte jaqsy bilemin, alaida bizde Qazaqstannyń týristik baǵyttary týraly kóp bile bermeidi. Búginde Qazaqstan biz úshin endi jańa qarqyndy týristik baǵyt retinde qyzyǵýshylyq týdyrýda. Qazirgi kezde Resei azamattarynyń kórshiles memleketter men TMD elderine saiahattap barýy qarqyny artyp keledi. Meniń oiymsha, «EKSPO-2017» bul turǵyda tyń serpin berip, adamdar kórmeden keiin de saparlaryn turaqty túrde jalǵastyratyn bolady», - dedi bas redaktor.
