AQSh ǵarysh agenttiginiń (NASA) Marstyń ishki qabattaryn zertteitin InSight apparaty 26 qarashada ǵalamsharǵa qondy. Mars ekvatoryna jaqyn aýmaqqa qonǵan apparat birneshe minýttan soń ǵalamsharda ózin-ózi túsirgen sýretterin jibere bastady.
Ǵalymdar InSight Mars atmosferasynda shamamen jeti minýttai qalqyp turyp, jaily qonǵanyn aitady. NASA Marsty zertteý missiiasyn alty jyldan beri birinshi ret ushyryp otyr. Missiia Jerden 301 million mil qashyqta ornalasqan Marsqa alty ai ushty. Missiia quny milliard dollarǵa baǵalanyp otyr.
InSight Marsta eki jyl (Marstaǵy ýaqyt boiynsha bir jylǵa teń) bolyp, ǵalamshardyń qalai paida bolǵany, Jerdiń paida bolýy týraly málimetter jinaidy dep josparlanyp otyr.
Missiia negizinen bir kezderi salystyrmaly túrde alǵanda jyly, ylǵaldy ǵalamshar bolǵan Mars ne sebepti qurǵaq, shóldi, sýyq jáne tirshilik belgisi joq ǵalamsharǵa ainalǵanyn anyqtaýǵa tyrysady.
NASA InSight missiiasy adamnyń 2030 jyldarǵa qarai Marsty túpkilikti zertteýine jol ashady dep úmittenedi.
