Naryqtaǵy monopoliiany boldyrmaý úshin satyp alýǵa qatysý limiti belgilenedi. Bul týraly Úkimet otyrysynda QR Qarjy ministri Erulan Jamaýbaev aitty, dep habarlaidy QazAqparat.
«Memlekettik satyp alý protsesi tolyǵymen elektrondy formatqa kóshirildi. Búkil protsess aiqyn jáne barlyǵyna qoljetimdi. Qabyldanǵan is-sharalardyń nátijesinde sońǵy jyldary bir kózden tikelei satyp alý úlesi 64-ten 39 paiyzǵa deiin qysqardy. Osy jyldan bastap tikelei satyp alýdyń taǵy 6 negizi Zańnan alynyp tastaldy. Satyp alýdy básekelestik tásilmen basym túrde júzege asyrý týraly talaptar, sondai-aq birinshi basshysynyń bir kózden satyp alýdy negizsiz qoldanǵany úshin jaýapkershiligi belgilendi», - dedi Erulan Jamaýbaev.
Onyń atap ótýinshe, satyp alý protsesin jetildirý maqsatynda elektrondyq dúken túrindegi jańa tásilder engizildi. Sondai-aq negizdemelik kelisimder jáne konkýrstyń reitingtik-baldyq júiesi engizilip jatyr.
«Bir kúndik firmalardyń satyp alýǵa qatysýyn shekteitin qarjylyq turaqtylyq kórsetkishi belgilendi. Qurylys salasyndaǵy jetkizýshilerdiń jumys tájiribesin avtomatty túrde esepteý úshin elektrondyq depozitarii engizildi. Naryqtaǵy monopoliiany boldyrmaý, sondai-aq shaǵyn jáne orta biznestiń ósýine múmkindik berý maqsatynda satyp alýǵa qatysý limitin belgileý josparlanýda. Bir kózden satyp alýdy odan ári qysqartý jalǵasatyn bolady», - dedi ol.
Ministr jetkizýshilerge qoiylatyn joǵary talaptardy boldyrmaý jáne sapaly taýarlar, jumystar men qyzmetterdi satyp alý úshin birizdendirilgen tehnikalyq erekshelikterdi keńinen qoldaný josparlanyp otyrǵandyǵyn aitty.
«Budan basqa, 2023 jyldan bastap ómirlik tsikl qunyn paidalana otyryp, satyp alýdyń jańa tásili engiziletin bolady. Bul da sapaly taýarlar, jumystar men qyzmetterdi satyp alýǵa yqpal etedi. Tapsyrys berýshilerge qoǵamdyq baqylaýdy jáne satyp alýdy júzege asyrý sapasyn arttyrý maqsatynda memlekettik organdardyń tiimdilik reitingin júrgizý jáne ony jariialaý usynylady», - dedi Erulan Jamaýbaev.
