Foto: Májilis baspasóz qyzmetinen
Búgin Parlamenttiń tómengi palatasynda ótken otyrysta depýtat Nartai Sársenǵaliev sý tasqyny kezinde baspanasy qiraǵan saiajai ieleriniń ótemaqysy ádiletti baǵalaǵanýy qajet ekenin aitty dep habarlaidy "Ult Aqparat".
"Búgingi depýtattyq saýalym qarǵyn sý qara shańyraǵyn aǵyzyp áketken aǵaiynnyń aryzy. Qyzyl sý arnasynan adasyp aqqanda qylarǵa amal tappaǵan adamdar topan sýdyń beti qaitqanda dalada qańǵyryp qalamyz ba dep qorqyp júr. Alpys kún tasyǵan sý, alty kúnde qaitqanmen qiiametin qaitaryp áketpeidi dep 2 apta buryn dál osy minberden aitqanym da sol edi. Jeriniń 800 shaqyrymynan Jaiyq ózeni aǵyp ótetin Batys Qazaqstan oblysyndaǵy aǵaiynnyń ahýaly qazir arqamdy aiazdai qaryp barady", - deidi N. Sársenǵaliev.
Depýtat kórsetken derekteri boiynsha Batys Qazaqstan oblysynda sý tasqynynan 1 292 turǵyn úige zaqym kelgen. Sonyń 116-sy – Qaratóbe, 243-i – Syrym, 218-i – Bórli, 649-y – Terekti, 43-i – Báiterek, 6-ýy – Tasqala aýdanynda, al 17 úi Oral qalasynda ornalasqan.
"Sý astynda qalǵan úidiń syz tartatyny, qabyrǵasy kógerip kópshilikti kúrkildegen jótelge dýshar qylatyny saraptamasyz-aq sanaly adam túsinetin dúnie", - dep otyr ol.
Sonymen qatar depýtat Batys Qazaqstan oblysyndaǵy saiajai máselesi kúrdeli ekenin aityp ótti. Onyń sózinshe Derkól, Shaǵan jáne Jaiyq ózenderindegi sý deńgeiiniń kóterilýi saldarynan 14 839 saiajai ýchaskesin sý basqan. Onyń 14 466-sy – Oral qalasynda, 112-si – Báiterek, 245-i – Bórli, 16-sy Terekti aýdandarynda ornalasqan.
"Ol jaqta myńdaǵan adam turady. Saiajai degeniń qazaq úshin demalys kúnderin ótkizetin emes, turaqty turatyn orynǵa ainalǵaly qashan. Sonyń ótemaqysyna qatysty túsinispestik áli toqtamai tur. Óitkeni, aǵyndy sýdyń astynda qalǵan saiajai iesine qansha aqsha beriledi nemese qashan, qai jerden basqa úi usynylady? Bul derekter ázirge ortalyqtandyrylmaǵan. Aqparat jurtqa jedel jetýi shart. Tasqyn sý tosynnan kelgende tosyp úlgermegen myńdaǵan qandas qazir BQO-da seń soqqan balyqtai eseńgirep qaldy. Olardyń ákimdikke baryp janaiqaiyn jetkizgenin dúiim jurt kórdi. Sondyqtan onsyzda qarǵyn sýdyń saldarynan qara shańyraqsyz qalǵan azamattardyń zańdy talaptaryn ýaqytyly oryndaýymyz qajet. Sebebi Memleket basshysy aitqandai «salaǵa jaýapty shendiler jaýapkershilik alýdan qashyp júrgende» el qaqaǵan qysta qatyp qalady", - dep otyr depýtat.
Depýtat premer-ministr Oljas Bektenovke joldaǵan saýalynda eki usynys-talap qoidy:
1. Sý astynda qalǵan baspana men saiajailardy baǵalaýy tiis komissiia jumysyn birizge keltirý kerek. Sol úshin ár aimaqtaǵy komissiianyń ár úi boiynsha qorytyndysy, negizdemesi, foto-video dáleldemeleri naqty bir jerge jinaqtalýy tiis.
2. Baspanasy qiraǵan saiajai ieleriniń ótemaqysy ádiletti baǵalaǵanýy qajet.
