31 jastaǵy astanalyq jeke kásipker Baýyrjan Samen ushaq apatynan qalai aman qalǵanyn aityp berdi, dep habarlaidy Sputnik Qazaqstan.
Baýyrjan Samen – Nur-Sultan qalasynyń turǵyny. Ol kólik turaǵyn jáne kólikti jalǵa berý salasynda jumys isteidi. Jeke kásipker eki áriptesimen birge seisenbi kúni Almatyǵa jumys saparymen kelgen. Al búgin "Almaty - Nur-Sultan" baǵytyndaǵy Bek Air ushaǵymen elordaǵa keri qaitýy qajet bolǵan.
"Almatydaǵy jumystarym bitken joq. Búgin biletti aiyrbastaimyn degen oi bolǵan. Bek Air kompaniiasyna habarlastym. Olar ushaqqa otyrmaǵan jaǵdaida biletimniń qaitarylmaitynyn, onyń jaramsyz bolyp qalatynyn aitty. Jańa jyl qarsańynda bilettiń arzan emes ekeni belgili. Soǵan qaramastan sharýalarymdy bitirip alaiyn degen sheshimge keldim. Osylaisha, ushaqqa otyrý týraly oiymnan bas tarttym", - deidi Baýyrjan Samen.
Ol eki áriptesiniń de osyndai sheshim qabyldap, ushaqqa otyrmaǵanyn aitty.
Almaty mańyndaǵy ushaq apaty búgin tańǵy saǵat 07:22-de boldy. Osy ýaqytta Baýyrjan tańǵy namazyn oqyp jatypty. Ol qaiǵyly jaǵdaidy jańalyqtardan estip, abdyrap qalǵan.
"Bul ushaqqa men de otyrýym qajet bolǵan. Bizdiń tikushaq, bizdiń reis, bizdiń ýaqyt, ony men tekserdim. Jańalyqty óte aýyr qabyldadym, kóńil-kúiim tolqyp ketti. Alla saqtady, oǵan kúmánim joq. Qaza tapqan adamdardyń ishinde men de bolýym múmkin edi. Meni qoishy, ata-anam, týǵan-týystarym qaiǵyrady ǵoi. Bul jańalyq olarǵa aýyr tieri anyq. Dostarym meni Allanyń qoldaǵanyn, onyń maǵan jospary bar ekenin, ekinshi týǵan kúnimniń paida bolǵanyn aitty, - deidi jeke kásipker aǵynan jarylyp.
Aitýynsha, ushaq apaty týraly jańalyqty estip, anasynyń júregi aýyrǵan.
"Keiin kishigirim quran oqytyp, sadaqa berdim. Apattan qaza tapqandardyń otbasynyń qaiǵysyna ortaqpyn. Olarǵa Qudai kúsh-qýat bersin. Barlyǵy jaqsy bolsyn dep tileiik", - dedi ol.
Sóz sońynda kásipker búgin túnde Nur-Sultanǵa ushaqpen ushyp keletinin tilge tiek etti. Ol "búgingi jaǵdaidan soń, ushaqqa otyrýǵa qoryqpaisyz ba?" degen suraqqa qysqa jaýap qaiyrdy:
"Basqa amalym joq. Elordada jumystarym bar".
Almatydaǵy ushaq apaty
Qaiǵyly oqiǵa búgin tańerteń boldy. Bek Air áýe kompaniiasynyń "Almaty – Nur-Sultan" baǵytyndaǵy Fokker 100 ushaǵy Talǵar aýdanynda qulady.
Sońǵy málimetterge sáikes, apat 15 adamnyń ómirin qidy. Ushaqta 93 jolaýshy men 5 ekipaj múshesi bolǵan.
Prezidentiń tapsyrmasymen premer-ministr jetekshilik etetin komissiia quryldy. Qaýipsizdik erejelerin buzý baby boiynsha sotqa deiingi tergeý bastaldy.
