Bokstan Qazaqstan ulttyq quramasynyń bas bapkeri Indoneziiada ótip jatqan Aziada aiasyndaǵy jekpe-jekter týraly óz oiymen bólisip, shaǵyn suhbat berdi.
- Myrzaǵali Qulanuly, Aziia oiyndaryndaǵy boksshylaryńyzdyń aiaq alysy qalai?
- Men ózim baptaityn erler quramasynan jeti boksshyǵa úmit artyp, Djakartaǵa alyp keldim. Sol jeteýdiń altaýy jarys jolynda. Keshe, bir boksshymyz Qairat Eraliev qana jarys jolynan shyǵyp qaldy. Qalǵan alty boksshy shirek finalǵa ótti. Ony ózderińiz de baiqap, kórip otyrǵan bolarsyzdar.
- Qairat qai jerde múlt ketti?
- Óz shákirtimniń jekpe-jegine kóńilim toldy. Ol keshe jaman judyryqtasqan joq. Barynsha el namysyn abyroimen qorǵaýǵa tyrysty. Qarsylasynan úsh raýnd boiy basym boldy. Ókinishke qarai, tóreshiler sheshimi basqasha boldy. Artynan osynda júrgen áriptesterimiz Qairatqa qiianat jasalǵanyn aityp jatty. Qytai, japon sportshylary da, bapkerleri de bizge Qairattyń qarsylasynyń jeńisine kúmánmen qaraǵanyn aitty. Biraq, ol da osal boksshy emes, álem chempionatynyń qola júldegeri, Aziia chempionatynyń jeńimpazy. Olimpiada oiyndarynda óner kórsetip júrgen boksshy. Kezinde Serik Sápievke, Baqtiiar Artaevqa da osyndai qysymdar jasalǵan bolatyn. Biraq, olar sol tóreshilerdiń qiianatynan qirap qulap ketken joq. Artynan talai biikterdi baǵyndyrdy. Olimpiada chempiony boldy. Sondyqtan, bir sátsizdikke bola biz moiynsunaiyq dep turǵan joqpyz. Qairat áli otyzǵa da tolǵan joq. Alar asýy áli alda dep senemin. Bizde Olimpiada, álem chempiondary sanaýly ǵana. Sol sanaýly boksshylardyń biri osy - Qairat Eraliev.
- Ózge jigitterimizdiń jekpe-jegine qalai baǵa beresiz?
- Barlyq boksshylar óte jaqsy daiyndyqpen keldi. Alǵashqy jekpe-jekterin jeńispen bastap, shirek finalǵa shyqty. Endi, bir-eki qadamyn sátti ótse, ary qarai medalǵa da qol jetkizemiz. Sol úshin qalǵan boksshylardyń daiyndyǵymen jumysymyzdy jalǵastyryp jatyrmyz.
- Buiyrsa neshe altyn alamyz dep josparlap otyrsyzdar?
- Osyǵan deiin josparymyzdy aitqan bolatynmyn. Bul - Aziia oiyndary, «Saryqurlyqtyń» kil myqtylary jinalǵan doda. Sondyqtan osal qarsylastar joq. Buiyrtqanyn alamyz. Ýaqytynda kóre jatarsyzdar...
- Áńgimeńizge rahmet!
