Bokstan Qazaqstan ulttyq quramasy bas bapkeriniń keńesshisi Myrzaǵali Aitjanov qazaqstandyq sportshylardyń kásipqoi boksqa ketýiniń sebebin aitty, dep habarlaidy Sputnik Qazaqstan.
Kásipqoi boks
Qazaqstan quramasyn shamamen 10 jyldai jattyqtyrǵan burynǵy bas bapkerdiń aitýynsha, sportshylardyń kásipqoi boksqa aýysýynyń óz sebebi bar.
"Biz barlyǵyn ustap tura almaimyz. Nege? Sebebi, bokshylardyń basym bóligi otbasyly. Al ulttyq quramada barlyǵyna oryn tabyla bermeidi. Sondyqtan keibir sportshylar "kásipqoida baǵymdy synaiyn, erterek chempion belbeýlerin utyp alaiyn, álem chempiony atanaiyn" dep sol jaqqa aýysyp jatyr", - deidi ol.
Osy oraida Myrzaǵali Aitjanov kásipqoi boksqa aýysyp, sátti óner kórsetip júrgen Daniiar Eleýsinovke jeke toqtaldy.
"Daniiar áýesqoi boksta, iaǵni Aziia chempionaty, Aziia oiyndary, Álem chempionaty, Olimpiada oiyndarynda top jaryp, birinshi oryn aldy. Sondyqtan ol kásipqoida Gennadii Golovkin aǵasy siiaqty "ózimdi sol jerde synaimyn, kásipqoi bokstyń ringin baǵyndyramyn" dep sol jaqqa aýysty. Biz oǵan sáttilik tileimiz. Habarlasyp turamyz", - dedi Aitjanov.
Tokio Olimpiadasy
Myrzaǵali Aitjanov qazir bokstan Qazaqstan ulttyq quramasy bas bapkeriniń keńesshisi qyzmetin atqaratynyn atap ótti. Ol 2020 jyly Tokioda ótetin jazǵy Olimpiada oiyndaryna boksshylardyń qalai daiyndalyp jatqanyn aitty.
"Rio Olimpiadasynan keiin myqty degen boksshylarymyz kásipqoi boksqa aýysty, al keibiri sporttyq karerasyn aiaqtady. Biraq soǵan qaramastan Qazaqstan boksy dami beredi. Búginde rezerv jaǵy jaqsy jolǵa qoiylǵan. Sonyń arqasynda bokstan Qazaqstan quramasy jas boksshylarmen tolyǵyp jatyr", - dedi bas bapkerdiń keńesshisi.
Dúbirli dodada kim top jarýy múmkin?
Myrzaǵali Aitjanov aldaǵy jyly ótetin Olimpiada oiyndarynda qai boksshynyń top jaryp, kim altynnan alqa taǵynatytyn naqty aita almaitynyn jetkizdi. Alaida bas bapkerdiń keńesshisi bolashaǵynan zor úmit kúttiretin sportshylar bar ekenin atap ótti.
"Olimpiadada osy salmaqta myna jigit olimpiada chempiony bolady" dep biz esh ýaqytta aita almaimyz. Bul dúbirli dodada boljam jasaý qiyn. Alaida kelesheginen úmit kúttiretin boksshylar bar. Mysaly, ulttyq quramada 5 boksshymyz Olimpiada medaline laiyq. Ondai jigitter bar", - dedi ol.
Onyń aitýynsha, Rio Olimpiadasynan keiin ulttyq quramada burynnan daiyndalyp júrgen 2 boksshy qalypty. Ol - Qairat Eraliev pen Vasilii Levit.
"Olar Tokio Olimpiadasyna barýǵa úmitti. Sol úshin daiyndalyp jatyr. Úmit artatyn basqa da jas boksshylarymyz bar. Mysaly, bokstan álem chempionatynda ekinshi oryn alǵan Qamshybek Qońqabaev bar. Ol – Qazaqstan quramasynyń kapitany. Ol jigitten de zor úmit kútýge bolady. Men jigitterdiń eshqaisysyn bólmeimin", - dedi Myrzaǵali Aitjanov.
Sonymen qatar ol búginde bokstan Qazaqstan ulttyq quramasy elordadaǵy QR prezident kýbogy qarsańynda oqý-jattyǵý jiyndaryn ótkizip jatqanyn jetkizdi. Onyń pikirinshe, bul jarys sportshylardyń daiyndyǵyn kórsetedi.
"Bul saiys boksshylardyń múmkindigi men kemshiligin kórsetedi. Sondai-aq, munda álem chempionatyna kim baratyny anyqtalady", - dep túiindedi sózin bas bapkerdiń keńesshisi.
Aita keteiik, "Qazaqstan prezidenti kýbogy" VII halyqaralyq týrniri 16-20 shilde aralyǵynda astanada ótedi. Bul saiysqa Aljir, Bolgariia, Grýziia, Úndistan, Qazaqstan, Qytai, Qyrǵyzstan, Mońǵoliia, Resei, Siriia, Filippin, Ózbekstan, Tájikstan elderiniń boksshylary qatysady. Jekpe-jekter erler arasynda 8 salmaq dárejesinde jáne áielder arasynda 5 salmaq dárejesinde ótedi.
Jarysta birinshi oryn alǵan boksshylar 2000 dollar, ekinshi oryn – 1000 dollar, úshinshi oryn – 500 dollar kóleminde syiaqy alady.
