Bokstan Qazaqstan komandasy Aziia oiyndarynyń tarihynda tuńǵysh ret altynsyz qaldy. Búgin finalda judyryqtasqan eki boksshymyz da kúmisti qanaǵat tutqan bolatyn. Osy oraida, ulttyq quramanyń bas bapkeri Myrzaǵali Aitjanov Olympic.kz saityna suhbat berip, jeńilistiń sebebin túsindirdi.
«Aziia oiyndaryna bes júlde alamyz dep kelgenbiz. Oǵan shamamyz da jetetin edi. Alaida, tym tómen nátije kórsetip otyrmyz. Ár el óz sportshysyn qorǵaidy. Sol sebepti, bir eldiń sońyna túsip alǵanymyz durys bolmas. Jigitter bar kúshin saldy, olarǵa aitarym joq. Kóptegen kedergiler men keleńsiz jaittar oryn alyp otyr. Finalǵa deiin úsh boksshymyzdyń jolyn kesken. Endi, mine, eki jigitimizdiń altynyn tartyp aldy. Sabyr qylǵannan basqa amal joq.
Jalpy, bizge sharshy alańdaǵy qarsylastarmen ǵana emes, basqalarmen de kúresýge týra keldi. Qairat Erálievti alyp tastaǵannan keiin-aq, qiyn soǵaryn sezdim. Tipti, Aziia oiyndaryna attanar kezde de bul belgili bolǵan. Sebebi, bizdiń bir ókilimiz joq. Qazaqstandyq tóreshiler de alynbaǵan. Sondyqtan, Aziia oiyndarynda saiasat jeńdi.
Aslanbek Shymbergenovke joq jerden eskertý berip, upaiyn alyp tastady. Boksshyǵa úsh-tórt ret aýyzsha eskertý berilgen soń ǵana, upaiyn alyp tastaýshy edi. Bul joly birden...
Jigitterge aitar ókpem joq. Bar kúshin saldy», - dedi Myrzaǵali Aitjanov.
Eske sala keteiik, búgin Aziada finalynda judyryqtasqan Aslanbek Shymbergenov (69 keli) pen Ábilhan Amanqul (75 keli) tóreshiler sheshimimen jeńilis tapty.
Kópshilik mamandar men jankúierler qazaq boksshylaryna qiianat jasalǵanyn aitýda. Eki boksshy da finalda altynǵa laiyqty óner kórsetken bolatyn.
