Majarstan jyl saiyn Qazaqstan stýdentteri úshin 250 oqý grantyn bólip keledi, dep habarlaidy QazAqparat.
QR Premer-Ministriniń orynbasary – Syrtqy ister ministri Muhtar Tileýberdi Majarstannyń syrtqy ekonomikalyq bailanystar jáne syrtqy ister ministri Peter Siiartonyń Qazaqstanǵa jumys sapary barysynda osyndai málimet keltirdi.
«Investitsiialyq jobalar energetika, onyń ishinde jańartylatyn energiia kózderi, munai jáne gaz, aýyl sharýashylyǵy, farmatsevtika, kólik pen logistika siiaqty mańyzdy salalarda iske asyp jatyr. Búginde Astana halyqaralyq qarjy ortalyǵynyń alańynda óz ókildigin ashý múmkindigin qarastyryp otyrǵan Majarstan kompaniialarynyń sany ulǵaiýda. Sonymen qatar ekijaqty yntymaqtastyqtyń mańyzdy elementteriniń biri – bilim salasy. Qazirgi tańda Majarstanda elimizdiń bir myńǵa jýyq stýdenti bilim alp júr. Bul maqsatta dostas memleket jyl saiyn 250 grant bólip otyr», - dedi SIM basshysy.
Sondai-aq, ol majar tilinde bilim alýǵa qyzyǵýshylyq tanytatyn stýdentterdiń sany artyp kele jatqanyn atady.
«Majar joǵary oqý oryndarynda qazaq tilin úirenip júrgen majar stýdentterine de rizamyz. Bul jastardyń keleshekte elderimizdi bailanystyratyn «jandy kópirge» ainalatynyna kúmán joq. Qazaqstan-Majar qarym-qatynasynyń aýqymy biz kótergen máselelermen ǵana shektelmeitinine senimdimin. Ótkizgen kelissózderimiz ózara tiimdi yntymaqtastyqty odan ári damytýǵa keń óris ashady. Majarstannyń Syrtqy ekonomikalyq bailanystar jáne syrtqy ister ministri Peter Siiarto myrzanyń sapary ekijaqty, kópjaqty formatta Nur-Sultan men Býdapesht arasyndaǵy strategiialyq áriptestik qarym-qatynasty nyǵaitýǵa qosymsha serpin beredi dep úmittenemin», - dedi Muhtar Tileýberdi.
