Qostanai oblystyq máslihatynyń kezekti sessiiasynda «Eńbek» nátijeli jumyspen qamtý jáne jappai kásipkerlikti damytý baǵdarlamasynyń júzege asyrylý barysy talqylandy, dep habarlaidy "Ult aqparat".
Oblystyq Jumyspen qamtýdy úilestirý jáne áleýmettik baǵdarlamalar basqarmasynyń basshysy Aida Qusaiynovanyń aitýynsha, byltyr baǵdarlamanyń birinshi baǵyty boiynsha 2 682 adam oqytýǵa jiberilgen. Olar oblystaǵy 33 bilim berý uiymynda jáne 3 oqý ortalyǵynda 35 mamandyq boiynsha dáris aldy. Oqyp shyqqan adamdardyń 1 673-i jumysqa turǵan.
«Baǵdarlamanyń ekinshi baǵyt boiynsha jańa biznes-ideialardy júzege asyrý maqsatynda, jalpy somasy 364,5 mln teńge bolatyn 769 grant berildi. 480 azamat tiesili grantyn eńbek quraldaryn alýǵa jumsasa, 205 adam bul múmkindikti tehnologiialyq qurylǵylar alýǵa, 84 jas kásipker mal men qus satyp alýǵa jumsady. Aimaqtyq kvotamen 1 651 adam qamtyldy. Olardyń 836-sy ońtústik óńirden qonys aýdarǵandar bolsa, qalǵany – syrt elderden kóship kelgen qandastar. Bul azamattardyń barlyǵymen áleýmettik kelisimshart jasasýǵa, kóshi-qondaryna sýbsidiia tóleýge, baspana jaldaýǵa nemese satyp alýǵa 440 mln teńge bólingen. Sonyń arqasynda 176 otbasy úimen qamtyldy», - dedi basqarma basshysy.
Byltyr oblysta 16 myńǵa jýyq jumys orny ashyldy. Onyń 9 708-i – turaqty jumys orny. Memlekettik baǵdarlamalar aiasyndaǵy jobalar arqyly paida bolǵan jumys oryndarynyń sany – 8 732. Biyl jumyspen qamtý sharalarymen 22 500 adamdy qamtý josparlanyp otyr.
